MetaCorp conhuntamente cu Beyond Sport Limit Foundation ta hopi entusiasma pa anuncia cu pa prome biaha lo tin un evento unico entre e tres islanan ABC. Hibando e lema “Beyond Sport Limit Foundation & MetaCorp making a difference”, Beyond Sport Limit Foundation lo cuminsa un reto extraordinario, cual ta core tres marathon den tres dia entre e islanan.
Proximamente dia 28 di juni lo tuma luga e evento di MetaFit Walk & Run 2026 na Aruba. Pa por promove mas inclusion bou di nos comunidad special, Beyond Sports Limit Foundation hunto cu MetaCorp como patrocinador, a dicidi di organisa un marathon di tres dia, cual lo core 42 kilometer na Boneiro dia 26 di juni, mientras su siguiente dia lo core un otro 42 kilometer na Corsou y diadomingo dia 28 di juni lo core e ultimo 42 kilometer na Aruba durante e actividad MetaFit.
Durante e caredanan na Boneiro y Corsou, lo core cu tres stoel special, caminda 2 atleta special di Aruba lo ta participando den e reto mientras a invita un atleta special local di cada isla pa forma parti di e experiencia. Na Aruba lo conclui e marathon cu cinco atleta special. Aunke cu Beyond Sport Limit Foundation a participa anteriormente na diferente evento riba e islanan, esaki ta prome biaha cu ta organisa un reto di e magnitud aki consecutivamente riba tur tres isla den un periodo di tres dia tras di otro.
Trahando cu un “buddy system”, cada atleta special lo wordo compaña pa un atleta di Beyond Sport Limit Foundation. E compañeronan aki ta sigura cu e atleta special por disfruta plenamente di e experiencia, manteniendo tur medida di siguridad necesario durante e recorido.
Ademas di MetaFit, MetaCorp y su subsidiarionan tin un programa amplio di actividadnan deportivo, social, cultural y educacional. Di e forma aki e compania ta demostra nan compromiso cu nan empleadonan y comunidad. Basa riba mas di 100 aña di tradicion, e cultura di MetaCorp ta enfoca ariba inversion den e factor humano, promoviendo bienestar y satisfaccion entre su empleadonan, cu na nan turno ta brinda bon servicio na e clientenan.
Beyond Sports Limit Foundation a wordo funda na november 2022 pa Brainer Lampe, inspira pa e ideologia di Dijondrick Jacobs, cu tur persona, sin importa su limitacion, mester tin e oportunidad pa sigui nan pasion, cumpli cu nan soñonan y pasa nan mesun limitacionnan.
Awendia e fundacion ta conta cu 44 atleta special, 13 boluntario conoci como “buddies”, 5 rolstoel, 3 bicicleta special y 2 kayak special. Desde su fundacion, e organisacion a conta cu sosten incondicional di MetaCorp den tur nan proyectonan, permitiendo cu mas persona cu necesidadnan special por participa activamente den deporte y recreacion.
