Diabierna mainta Minister di Finansa, Asunto Economico y Sector Primario, mr. Geoffrey Wever orguyosomente a anuncia un otro edicion di Savaneta Seafood Festival, cual lo tuma luga dia 27 di september 2026 na Savaneta. E festival, organisa den colaboracion cu Fundacion Savaneta Prome Capital y diferente partnernan publico y priva, a bira un plataforma importante pa promove e sector di pesca local, stimula actividad economico y celebra e identidad unico di Savaneta como pueblo di pesca.
Durante e conferencia di prensa di awe, organizadornan y partnernan involvi a comparti e vision pa e edicion di e aña aki, cu lo sigui elabora riba e exito di e aña anterior. Bishitantenan por spera un amplio oferta di seafood local fresco, preparacion culinario creativo, entretenemento cultural, musica live, artesania local y diferente actividad pa henter famia.
Pa Minister Geoffrey Wever, e festival ta representa hopi mas cu un evento recreativo. E ta un instrumento concreto pa fortalece e sector primario, crea oportunidadnan economico pa piscadornan, comerciante y empresarionan local, y mustra e baloa y importancia di produccion local den e desaroyo sostenibel di Aruba.
“Savaneta Seafood Festival ta mustra con nos sector primario por bira un motor importante pa desaroyo economico. Ora nos ta promove nos piscadonan, nos producto local y nos cultura, nos no solamente ta creando actividad economico, pero tambe nos ta preservando un parti esencial di nos identidad como pueblo. E festival aki ta un ehempel concreto di con colaboracion entre comunidad, sector priva y gobierno por genera resultado positivo pa Aruba,” Minister Geoffrey Wever a expresa.
E festival ta completamente alinea cu e prioridadnan di e Programa di Gobernacion AVP-FUTURO 2025-2028, cu ta pone enfoke riba fortalecemento di e sector primario, apoyo na comercio local, diversificacion economico y creacion di oportunidadnan paempresarionan y productornan local.
Gobierno ta sigui inverti den iniciativanan cu ta duna mas visibilidad na e industria di pesca y cu ta contribui na posiciona Savaneta como centro principal di actividad di pesca na Aruba. E vision ta cla: construi un ecosistema unda pesca, gastronomia, cultura y turismo por complementa otro y crea balor pa generacionnan presente y futuro.
“Nos meta ta pa sigui construi riba e fundeshi cu a wordo poni den añanan pasa. Savaneta tin tur e potencial pa consolida su posicion como capital di pesca di Aruba. Un evento manera Savaneta Seafood Festival ta trece nos mas cerca na e objetivo ey, creando oportunidad pa nos piscadonan, promoviendo consumo di producto local y fortaleciendo e economia di nos comunidadnan,” Minister Wever a agrega.
Mas informacion tocante programacion, entretenemento y participantenan lo wordo comparti den e lunanan cu ta bin.
Ministerio di Finansa, Asunto Economico y Sector Primario ta invita residente y bishitantenan pa marca dia 27 di september 2026 riba nan calendario y forma parti di un celebracion unico di seafood Arubiano, cultura local y orguyo comunitario.
