Den cuadro di e esfuersonan pa mehora e servicionan di DIMAS, recien a inicia cu un proyecto piloto na MFA Noord. Cu esaki DIMAS ta mehora accesibilidad drentando den districtonan tur rond di Aruba y brinda su servicionan di Helpdesk na usuarionan cerca di cas. Pa awo, e servicio di Helpdesk na MFA Noord ta solamente pa esnan cu tin cita traha caba.
Servicionan manera informacion general, entrega di documento cu falta of pago, por wordo haci na oficina principal di DIMAS na Paardenbaaistraat.
Ademas DIMAS a pone un number nobo di WhatsApp disponibel na unda por haya informacion general di e procesonan pa permiso y di documentonan necesario pa cada tipo di permiso. E number +297 569 8173 ta exclusivamente pa manda mensahe di dialuna pa diabierna entre 8’or di mainta y 3:30 di atardi. Tene cuenta cu lo no ricibi yamada a traves di e number aki. Ademas ta haci un suplica pa manda mensahenan completo, pues tur informacion den un solo mensahe. Inclui nomber, number di CRV, duna detayes di e caso specifico y formula preguntanan mas duidelijk posibel.
Cu e esfuersonan aki, DIMAS ta busca pa facilita acceso na informacion, reduci tempo di espera y brinda servicio mas eficiente y accesibel pa comunidad. Durante e dianan aki, DIMAS lo evalua e resultadonan y identifica oportunidadnan pa amplia e servicio na otro distrito den futuro cercano.
