Minister Geoffrey Wever: Di dos edicion di Fiesta di Cunucu a resulta den un dia di celebracion pa nos grandinan y sector primario

E di dos edicion di Fiesta di Cunucu a resulta un exito rotundo. Diadomingo ultimo, Santa Rosa a bira e punto di encuentro caminda nos adultonan mayor a wordo honra y nos herencia agricola a wordo celebra den un ambiente autentico di cunucu. E evento a reuni famia, cultivadornan y ciudadanonan di tur edad den un dia yena di cuminda crioyo, producto local fresco, musica y momentonan di reconocemento.

E Fiesta di Cunucu ta un colaboracion entre Ministerio di Finansa, Asuntonan Economico y Sector Primario, Ministerio di Asuntonan Social y Cuido di Adulto Mayor, Directie Ouderenzaken y Departamento di Agricultura, Cria y Pesca  Santa Rosa. E colaboracion aki a combina dos misionnan cu ta complementa otro na un forma unico, fortalecemento di produccion local y promocion di bienestar, alegria y sentido di comunidad pa nos grandinan. E resultado di e iniciativa aki a papia pa su mes. Centenares di personanan a pasa na Santa Rosa, pa disfruta y comparti momentonan cu lo keda graba den memoria.

E programa a inclui benta di diferente producto local y reconocemento special “Amigonan di Santa Rosa” di nos adultonan mayor cu pa hopi aña ta apicultor, agricultor/cunukero, horticultor, piscado y/of criado di bestia y den bon colaboracion cu Santa Rosa; Sr. Luis Beltran Winterdaal, miho conocí como Luee Bee, un apicultor conoci rond full Aruba, Sr. Francisco Simon Croes, mihor conocí como Chico, un agricultor di e bario di Tanki Leendert, Sr. Yasheng Li, un horticultor cu ta cultiva diferente berduranan oriental, Sr. Elauterio Briesen, miho conocí como “Techi”, kende ta un piscado for di su 16 aña y Sr. Gregorio Wolff kende ta un cunukero y criado di bestia chikito desde aña 1978 na Palm Beach, den cunucu cu tabata di su welo.  E evento a stimula contacto genuino entre generacionnan y a pone den practica e mision di dos ministerio.

“E Fiesta di Cunucu a demostra loke por ta posibel ora dos ministerio traha hunto cu un vision comparti. Nos a celebra nos grandinan, nos cuminda local y nos tradicionnan den sector primario y nos a haci esey den e lugar mas apropia: nos cunucu. E energia di e dia aki ta nos inspiracion pa sigui,” Minister Geoffrey Wever a comenta .

Minister Geoffrey Wever ta gradici tur persona cu a contribui na e exito di e di dos edicion di Fiesta di Cunucu. Danki na Directie Ouderenzaken, Departamento di Agricultura, Cria y Pesca Santa Rosa, tur criador, boluntario y cada famia cu a pasa su diadomingo hunto cu nos. Un pueblo uni ta haci forsa y e Fiesta di Cunucu a prueba esakiun biaha mas.