Dialuna mainta e Homber E.G. (22), acusa di bende droga y posecion di arma di candela a presenta dilanti Hues pa scucha su sentencia.
SOLO DI PUEBLO por a compronde cu Hues a declara E.G. liber pa posecion di armanan di candela y a condena E.G. na castigo mas abao cu Fiscal a exigi.
BENDE DROGA Y POSECION DI ARMANAN
Tratamento di e caso a tuma lugar luna pasa, caminda Fiscal a bisa cu e acusacionnan contra E.G. ta, cu entre Mei 2025 y November 2025 e tabata bende marihuana y entre 6 Augustus 2025 y 24 November 2025 E.G. tabata den posecion di armanan di candela.
FISCAL A EXIGI 30 LUNA
Fiscal ta haya cu E.G. tabata dedica su mes cu bendemento di marihuana y tabatin arma pisa. Na opinion di Fiscal, no tin bista cla cuanto droga E.G. a bende. Fiscal a bisa tambe cu e no ta haya cu E.G. realmente ta arepenti. El a mustra cu tin arma ainda ta riba caya. Fiscal a exigi 30 luna di prison di cual 6 luna ta condicional cu 3 aña di prueba. El a exigi tambe cu e cellular lo mester keda confisca.
DECLARA LIBER DI ARMA
Hues a bisa cu e ta declara E.G. liber di posecion di armanan di candela entre 6 Augustus 2025 y 24 November 2025. Hues a bisa cu durante tratamento di e caso, tabatin discusion riba e arma semi automatico. Ta trata di un potret di E.G. cu un arma den man. E.G. a bisa cu 2 aña promer el a saca potret cu e arma na Colombia. Hues ta haya cu no por bisa cu E.G. tabatin e arma na Aruba y no por acopla e arma na Aruba pasobra e fecha di e potretnan di arma cu a haya den cellular di E.G. ta hopi despues di e fecha cu E.G. ta bisa. Hues a mustra cu un otro potret di E.G. cu un arma banda di cas di E.G., no ta mesun cos cu e otro potret cu E.G. tabatin den su cellular. Hues a bisa cu el a compara e potretnan y nan no ta e mesun arma. Pesey Hues ta declara E.G. liber di posecion di e armanan di candela.
BENDEMENTO DI DROGA
Hues ta haya proba e acusacion di posecion y bende marihuana. Hues a mustra cu E.G. mes a bisa den Corte, cu el a pone droga y prijs riba snap chat. Hues ta haya proba cu entre Juni 2025 y November 2025, E.G. tabatin droga. Hues a rechaza defensa di abogado riba esaki.
A VIOLA PROCESO DI SCUCHA CELLULAR
Hues a sigui riba e cuestion di scucha cellular. Hues a bisa cu e ta rechaza e defensa di abogado cu lo a tap cellular cu no tabata di E.G. Hues ta haya cu tin tur indicacion cu ta e cellular di E.G. y tabatin permiso di Hues Comisario pa haci esaki.
Hues a duna abogado mr. Carlo razon cu segun ley no ta permiti pa usa e aparato cu Polis a usa pa gara cellularnan y scucha. Esaki por sosode, solamente manera mr. Carlo a bisa, cu autorizacion di Minister. Hues ta haya cu esaki ta un violacion di e proceso. Hues a splica cu den e caso aki solamente por usa un sancion, si e procedura ta perhudica E.G. den su interesnan. Hues ta haya cu abogado no a menciona interesnan di E.G. cu ta wordo perhudica. Hues tambe a rechaza ponencia di abogado cu E.G. tin I Phone y tin potretnan cu no ta procedente di I Phone. Hues a mustra cu E.G. mes a bisa cu tin potretnan cu el a usa cu un otro cellular.
CASTIGO COMBINA
Pa cu e castigo, Hues a bisa cu e lo impone un castigo mas abao cu loke Fiscal a exigi. Hues a bisa cu e ta haya cu E.G. tabata deal den marihuana. Hues a mustra cu marihuana ta afecta salud di hende y fomenta criminalidad. Hues a condena E.G. na 12 luna di prison, di cual 4 luna ta condicional y cu 2 aña di prueba. Hues a bisa tambe cu e cellular I Phone ta keda confisca.
