Dia 1 di juli 2026 Fundacion Preserva Aruba ta conmemora e abolicion di e ley di esclavitud transatlantico den Reino Hulandes. Riba 1 di juli 1863 487 persona a ser declara liber na Aruba.
Den e buki di historia skirbi pa Johan Hartog Aruba zoals het was zoals het werd – van de tijd der indianen tot op heden, di 1953 na pagina 227 ta indica cu segun e journal di e gobernador cu e dia di liberacion a pasa sin problema.
Tambe Hartog ta documenta cu e pueblo di Aruba a conmemora y a celebra e abolicion di e ley di sclavitud transatlantico pa e prome biaha riba dia 1 di juli 1888. Esaki a tuma luga binti y cinco aña depues di e dia di liberacion. E ta informa cu e dia memorabel aki di e tempo ey a cay riba un diadomingo. Riba e dia aki un misa a wordo teni den e Misa Protestant na Playa a conmemorando e liberacion. E siguiente dia esta dia 2 di juli 1888 esaki a tuma luga na e misa Catolico na Playa. Despeus di e misa muchanan di e scol Catolico y e scol publico a cana pa e cas di e gobernador na Ponton. E scol Catolico tabata situa cerca di loke nos conoce awo como e Maria Convent na Playa cu tabata traha di torto., e scol publico cu a wordo traha cu piedra tabata locual awo ta e oficina di CBS/Oficina di Estadistica den Wilhemin straat y e cas di gobernador tabata situa na Ponton. Dilanti di e cas di gobernador muchanan di scol a canta e himno di Hulanda y otro canticanan. E gobernador, Jacob Thielen II, a papia cu nan y a duna nan un treat.
Nos no sa ta kiko e gobernador a bisa e muchanan. Nos ta supone cu el a gradici nan pa nan esfuerso di cana e caminda largo di nan scol te su cas den e solo pa canta entre otro e Wilhelmus. Fundacion Preserva Aruba ta interesa pa sa kiko e gobernador por a bisa. Si tin hende cu a tende di e historia aki for di nan famia comparti esaki cu nos. Nos whatsapp ta 7404342 y nos email ta preservaaruba11082023@gmail.com. Of scirbi un articulo bo mes y comparti’e.
Jacob Thielen II a bira gobernador riba dia 7 di juni 1888. El a tuma over di e gobernador David Gaerste. Gobernador Jacob Thielen II a hasi anotacion di e sucedidonan di dia 1 y 2 di juli 1888 den su journal y asina un parti di nos historia a wordo preserva cu Johan Hartog a pone den su buki pa nos lesa.. Basa riba e informacion aki Johan Hartog ta conta cu den anochi tabata tin baile na diferente luga como parti di e celebracion di e liberacion di e esclavonan na Aruba.
Nos sa si cu desde e aña 2012 cu fundacion We Culcha na San Nicolas a cuminsa cu e conmemoracion y celebracion di e liberacion di esclavo na un manera publico pariba di brug. Pa 124 aña cos tabata keto na Aruba relaciona cu e abolicion di sclavitud transatlantico. Ainda tin hende cu te e dia di awe no sa cu Aruba tambe a concoce sclavitud di hendenan Africano. Por ta cu hendenan a conmemora e dia aki den priva? Lo mester di investigacion pa haya sa si por ta Club Surnam a conmemora y celebra e dia aki prome cu 2012.
E lucha di e decsendientenan di sclavitud pa e reconocimiento di inhusticia hasi cu nan antepasadonan tin un historia largo. E lucha a cuminsa cu Anton de Kom ya caba den e aña 1920. Anton de Kom a skirbi e buki “Wij slaven van Suriname” (1937). Su lucha a wordo sigui cu un marcha den Amsterdam na 1960 y e lucha di diferente organisacionan na Hulanda cu a resulta na 2012 cu e Monumento den Oosterpark – Amsterdam y e Nationaal Instituut Nederlandse Slavernij erfgoed en erfenis (NiNsee). E lucha pa reconocimento di e papel di Hulanda den sclavitud transatlantico a culmina den e disculpa di Ministro Presidente Mark Rutte dia 19 di december 2022 y di rey Willem Alexander dia 1 di juli 2023. Na ocacion di e ultimo acontecimento gobernador di Aruba, gabinete Wever-Croes y nan invitadonan tabata presente na Museo Archeologico unda e disculpa di e rei a wordo sigui via television.
Dia 19 di juni 2023 e gobierno di Hulanda a pidi disculpa na e dos yuinan, cu tabata na bida ainda, di Anton de Kom. Tur dos a muri den 2024. Pa e famia di Anton de Kom nan lucha a dura mas cu un siglo
Ken ta corda kiko a wordo hasi na Aruba riba dia 1 di juli 2024?
Den 2025 e gabinete Wever-Croes a bocotia e comision di conmemoracion di sclavitud di Hulanda y no a conmemora e dia aki. Diferente fundacion a para ketu na e di aki. Fundacion Preserva Aruba a publica un articulo den corant relaciona cu e ley di abolicion di dia 8 di augustus 1862.
Dia 1 di juli 2026 e gabinete Mike Eman ta conmemora e dia aki cu un acto protocolario. Eski ta bay ta un dia historico pa Aruba.
Fundacion Preserva Aruba ta invita tur hende na Aruba pa refleha riba e dia aki, puntra bo mes kiko e dia aki ta nifica pa bo persona y con abo lo kier laga Aruba atras ora bo muri. Pa e directora di Fundacion Preserva Aruba e ta un dia di luto yena cu tristesa pa tur esnan cu contra nan boluntad a wordo teni den sclavitud y despues di su motro e ta desea di laga Aruba atras mihor cu el a hay’ e esta un Aruba sin discriminacion.
