Gobierno di Aruba ta sigui contribui activamente na e esfuerso internacional pa brinda ayudo humanitario na Venezuela despues di e temblor fuerte cu a afecta e region pa nort di e pais. Awe mainta, Prome Minister Mike Eman, hunto cu Minister di Turismo, Transporte y Labor, Wendrick Cicilia, representante di Departamento di Aviacion Civil, Aruba Airport Authority (AAA) y varios otro funcionario, a bishita e Airbus A400M Atlas di Forsa Aereo Aleman cu actualmente ta staciona na Aeropuerto Internacional Reina Beatrix. Alemania a scoge Aruba como base logistico pa crea un sorto di “puente aereo” humanitario cu ta brinda apoyo na Venezuela. Actualmente, dos vuelo ta sali diariamente for di Aruba pa transporta personal, ekiponan y asistencia medico. E operacion ta planifica pa continua te cu 2 di juli, despues di cual lo evalua e necesidanan na Venezuela.
Segun Prome Minister Eman, Aruba ta orguyoso di por contribui na un mision cu tin como obhetivo principal salba bida. “Pa nos ta un honor cu Alemania a escoge Aruba como e base for di cual ta sali tur e apoyo aerio pa Venezuela. Esaki ta mustra e confianza den nos pais y den nos capacidad pa facilita un operacion di e nivel aki,” Prome Minister Eman a declara. Durante e bishita, e delegacion a haya oportunidad pa mira di cerca con e Airbus A400M Atlas a wordo converti den un hospital aereo. E avion ta ekipa cu seis cama di cuido intensivo pa transporta pashent cu ta den un estado critico. “Ta impresionante pa mira e avion aki di paden. E operacion ta sumamente profesional. Bo ta mira e dedicacion di mas cu 20 persona, for di pilotonan te cu dokter, enfermero y personal tecnico, tur trahando hunto pa brinda cuido medico di e nivel mas halto,” Eman a bisa. Prome Minister a expresa su speransa cu e mision humanitario lo contribui pa yuda e sistema di cuido medico na Venezuela den e momento dificil cu e pais ta pasando. “Mi ta agradeci cu e tipo di ayudo aki ta disponibel pa Venezuela. Esaki ta un esfuerso cu tin un solo obhetivo: yuda esnan cu tin necesidad urgente di cuido medico,” el a declara. Prome Minister Eman tambe a expresa su gratitud na e comandante, e pilotonan, e team medico y tur e personal Aleman cu ta haci e operacion posibel. “Nos ta aki pa expresa nos gratitud na e pilotonan, e comandante, e capitan y tur e personal encarga cu e vuelo aki. Na mes momento, nos kier gradici Departamento di Aviacion Civil, Aruba Airport Authority N.V. y tur e instancia cu diariamente ta procesa e peticionnan pa permiti e vuelonan humanitario.”
Ademas di e operacion Aleman, Gobierno di Aruba ta sigui procesa e peticionnan di diferente avion y helicopter cu ta busca permiso pa aterisa na Aruba of uza e espacio aereo Arubano pa brinda asistencia na Venezuela.
“Esaki ta un trabou importante cu nos ta haci den solidaridad cu Venezuela. Tur esaki ta den cuadro di e cooperacion cu Reino Hulandes y otro paisnan cu ta contribui cu e esfuerso humanitario,” Prome Minister Eman a bisa.
Aruba a mustra su amor pa prohimo
Na final di su bishita, e Prome Minister a expresa su profundo aprecio na e pueblo Arubano pa e gran muestra di solidaridad cu Venezuela. “Nos ta mira un pueblo hopi solidario. E respuesta riba mi yamada pa yuda ta enorme. E cantidad di producto di prome necesidad colecta pa yuda Venezuela ta impresionante. Nos ta profundamente agradeci cu e pueblo di Aruba.” El a conclui su mensaje cu un palabra di gratitud. “Danki pa boso compasion. Danki pa boso amor pa boso prohimo. Boso solidaridad ta haci un diferencia importante den bida di hopi hende.”
Airbus A400M Atlas
E Airbus A400M Atlas ta un avion militar di transporte desaroya pa Airbus Defence and Space pa mision logistico, humanitario y medico. E avion por transporta carga pisa, vehiculo, personal y ekipo di emergencia riba distancia largo.Den e configuracion cu actualmente ta na Aruba, e avion a wordo adapta como un hospital aereo, cu seis cama di cuido intensivo y un team medico specialisa pa transporta pashent cu ta den estado critico. Danki na su capacidad pa opera den diferente circunstancia y riba diferente tipo di pista, e A400M ta considera un di e avionnan di transporte militar mas moderno y versatil den mundo.
