Diahuebs mainta Minister di Finansa, Asunto Economico y Sector Primario, Geoffrey Wever, a reuni cu representantenan di Camara di Comercio y Industria Aruba (KvK) pa intercambia pensamento riba un serie di prioridadnan strategico cu ta contribui na un economia mas fuerte, mas competitivo y mas resiliente. Durante e reunion, Gobierno y sector priva a reafirma e importancia di un dialogo continuo pa impulsa reformanan cu ta fortalece confianza den economia y crea un mihor ambiente pa inversion y desaroyo empresarial.
Un di e temanan principal tabata e siguiente pasonan den implementacion di e Landsverordening Waarborging Houdbare Overheidsfinancien (HOFA). Minister Wever a splica cu disciplina financiero, transparencia y un maneho presupuestario responsabel ta esencial pa garantisa stabilidad economico a largo plaso y pa fortalece confianza di inversionistanan, empresarionan y institucionnan financiero den Aruba.
Den cuadro di revitalisacion di e centronan urbano, minister Wever a duna un actualisacion riba e progreso cu Gobierno ta haciendo pa stimula inversion den Oranjestad y San Nicolas. E reunion a trata tambe e efecto positivo cu e incentivanan fiscal por tin riba inversion priva y actividad economico. Gobierno ta sigui crea e condicionnan pa comercio local, empresarionan y inversionistanan por haya mas oportunidad pa inverti, crece y contribui na desaroyo sostenibel di Aruba.
Riba e tema di regulacion di vacation rentals, manera Airbnb y otro plataformanan similar, minister Wever a comparti e progreso cu Gobierno ta haciendo pa implementa un cuadro regulatorio moderno cu ta garantisa competencia husto, proteccion di consumidor, un sistema fiscal balansa y un sector turistico sostenibel. E maneho integral ta busca pa trece un balansa entre estimulacion di inversion y proteccion di interes di comunidad.
Durante e reunion a intercambia tambe pensamento riba e importancia di reduci e economia informal y fortalece cumplimento cu e reglanan vigente. KvK a presenta su iniciativa pa desaroya un campaña di concientisacion tocante e economia informal, mientras cu tambe a papia di e progreso relaciona cu e Ultimate Beneficial Owner (UBO), simplificacion di procesonan administrativo y e siguiente pasonan pa modernisa e sistema di permiso empresarial.
Minister Wever a reafirma cu Gobierno ta comprometi na sigui reduci burocracia, aumenta eficiencia den servicio publico y crea un ambiente comercial cu ta duna empresarionan mas certesa y menos obstaculonan administrativo.
“Un economia fuerte no ta wordo construi solamente cu bon cifranan financiero, sino cu confianza, colaboracion y vision comparti. Gobierno ta sigui traha hunto cu sector priva pa implementa reformanan pa fortalece nos clima di inversion, crea oportunidadnan economico y prepara Aruba pa e desafionan di mañan. Solamente hunto nos por sigui construi un economia moderno, resiliente y duradero pa tur hende,” minister Geoffrey Wever a conclui.
