Boluntad di Dios ta pa den tur matrimonio homber ta di un solo muher y e muher ta di un solo homber. Hende fiel.
Awendia hopi no ta respeta esey y ta inventa hopi cuenta pa biba den pica y inmoralidad.(1 Thesalonisensenan 4:3-5).
Hopi hende kier dicidi kico nan ta haci cu nan bida, y hopi ta lubida cu e bida no ta di nan. Nos tur ta na bida pasobra Dios kier, y ta Dios tin e ultimo palabra den nos bida.( 1 Corintionan 6:19-20).
E palabra di Dios ta bisa den Mateo 6:33: Ma busca prome e reino di Dios y su husticia,y tur e cosnan aki lo wordo anjadi na boso.
Cada biaha cu nos sali for di boluntad di Dios, nos ta cay den desobedencia y tur hende sa cu desobedencia na Dios ta pica.Dios ta yama nos pa biba den obediencia.
Si un persona ta stima bo, e no por aleha bo for di caminda di Dios, ni tampoco pone bo bay contra boluntad di Dios.
Eynan ta un punto pa conoce amor berdadero y aparta for di manipulador y narcista.
Si un persona ta stima bo e no por pidi bo ningun prueba di amor cu ta hiba na inmoralidad.
Si un persona ta stima bo e ta sirbi Dios hunto cu bo, pasobra Dios ta boso prioridad.
Si un persona ta stima bo e ta perservera den oracion hunto cu bo, pasobra e sa cu esey ta pa boso bon.
Si un persona ta stima bo e ta encurasha bo pa sirbi, y pa atende e yamada di Dios riba bo bida.
Si un persona ta stima bo e ta encurasha bo pa cuida bo salbacion cu temor y temblor,
Asina cu un hende kier mas atencion pa su persona cu bo tin atencion pa Dios, tene cuidao pasobra arogancia ta presente.
Asina cu un hende ta pretende di tin dominio riba bo bida spiritual y cada rato ta bini cu excuus di cansancio, excuus di esaki y e saya, y asina causa retraso den bida di oracion, cuminsa reprende e asunto y lanta bo bida di oracion, pasobra ora diabel no por hanja bo e ta usa un pega cu bo.
Si tempo bo tabata soltero bo ta tabata anhela presencia di Dios y awor cu bo ta casa bo a fria, please samina bo bida.
Placa no por reemplasa Dios, no corre tras di placa y lubida riba Dios, pasobra imagina bo si un dia Dios lubida riba bo, ta con lo para cu bo?
Den Lucas 22:42 Hesus ta bisa lo siguiente: Tata si ta Bo boluntad kita e copa aki for di Mi,sinembargo , no Mi boluntad ma di Bo sosode.
Romanonan 12 :2 ta avisa nos lo siguiente: No sea conforme e mundo aki, ma sea transforma pa medio di renobacion di boso mente, pa boso por comproba kico ta e bon y agradabel y perfecto boluntad di Dios.
Boluntad di Dios ta pa tur yiu respeta nan mayornan, honra nan tata y nan mama, y pa mayor tambe duna bon ehempel den cas, lanta e yuinan den e palabra di Dios,sinja nan con pa aleha for di idolatria, pasobra solamente Hesus Cristo ta e caminda di berdad y e bida, ni un hende no por yega serca e Tata sino ta pa medio di dj’E.
Jeremias 10:23 ta para scirbi: O Senjor mi sa cu e caminda di hende no ta di dje mes,tampoco no ta keda na hende pa dirigi su pasonan.
Entrega completamente na Dios, y laga Cristo Hesus dirigi nos pasonan.
Sinceramente, Pastor Marcel Balootje
