Eduard Pieters: “Un pais no por papia di siguridad, mientras e homber- y muhernan cu mester proteha sociedad ta traha den inseguridad.”
Tin crisis cu no ta nace di un dia pa otro. Nan ta crece pocopoco, den silencio, te ora nan bira un peliger pa e trahadornan, e detenidonan y finalmente pa henter comunidad. Segun lider di fraccion di PPA, Eduard Pieters, esaki ta exactamente loke a pasa den Korrectie Instituut Aruba (KIA). Durante su disertacion den Parlamento, Pieters no a describi solamente un prison cu tin problema. El a pinta e retrato di un institucion nacional cu, despues di añanan di negligencia y un aña y mey di falta di accion concreto, a bira un berdadero bom di tempo.
Gobierno no por sigui laga e situacion empeora
Pieters a reconoce cu e problemanan den KIA no a cuminsa cu e gobierno actual. Pero precisamente, pasobra e situacion ta conoci pa hopi aña, cada minister tin e responsabilidad pa laga un institucion mihor cu con el a haya esey.
“Un aña y mei a pasa, pero pueblo ainda no ta mira resultado concreto.”
Segun e parlamentario, e escasez structural di personal cu ta varia entre 73% pa 75%, e falta di formacion, e presion laboral, e turno inhumano di hasta 12-16 ora continuo y e ausencia di un “gevarenpremie” pa e trahadornan cu diariamente ta riesga nan bida, ta demostra cu e problema ya no ta operacional, sino un fracaso di liderazgo.
Seguridad no por ta basa riba speransa
Pa Pieters, e situacion di seguridad ta igual di alarmante. Informacion cu fraccion di PPA a ricibi ta indica cu e machin di scan na entrada no ta operativo, debilitando un di e bareranan principal contra contrabando y entrada di p.e. Droga. E parlamentario tambe a cuestiona e uzo limita di e unidad K9. “Si e cachonan no ta presente diariamente, nan no por sustitui un sistema permanente di control.” Na esey ta suma cu e torennan di vigilancia cu no ta funciona, sistema di camara deficiente y infrastructura cu, segun diferente rapport internacional, ta den un estado deplorabel.
Ora e trahador no ta sigur, e pais tampoco no ta sigur
Pieters a dedica un gran parti di su disertacion na e hendenan cu diariamente ta pone nan bida na riesgo pa mantene orden den KIA. Schimmel den diferente seccion den KIA. E daknan cu ta menasa pa cay un ora pa otro. Area unda awa di riool ta core libremente. Ambiente laboral toxico. Falta di confianza. Falta di comunicacion. Segun Pieters, ningun trahador di Aruba mester opera bou di circunstancianan asina. “Con nos por exigi profesionalismo, si nos no ta garantisa e condicionnan minimo pa nan por haci nan trabou?”
Pieters tambe a lanta un pregunta fundamental tocante e mision di KIA.
Si cada detenido ta costa aproximadamente Awg 300 pa dia, pakico no tin un maneho serio di reintegracion? Pakico tin solamente dos psicologo y dos trahador social pa henter e institucion? Pakico e oportunidadnan educativo, manera e landsexamen, a wordo elimina?
“Si nos no inverti den rehabilitacion, nos no ta preparando ciudadano pa bolbe sociedad. Nos ta preparando recidivismo.”
E tempo pa reaccion ya a pasa
Pa Eduard Pieters, e debate di awe no tabata solamente tocante KIA. Tabata un yamada urgente pa gobierno tuma liderazgo. “Un pais no por papia di siguridad, mientras e homber- y muhernan cu mester proteha sociedad ta traha den inseguridad. Gobierno mester baha su orguyo, scucha e trahadornan y actua awe, prome cu e bom di tempo aki explota den cara di pueblo di Aruba.”
Paso, segun e lider di PPA, ora un institucion cu mester proteha sociedad ta bira un riesgo pa su mesun personal, e problema ya no ta di KIA so. E problema ta di henter Aruba.
