Divorcio ta un pleito cu no ta caba nunca, e ta sigi den e yuinan y hasta e nietonan ta bin sufri desoues pa motibo di divorcio.
E ta trece dolor den famia pa ambos banda, e ta kibra hende financiermente, e ta kibra hende su relacion cu Dios, e ta perhudica yuinan gravemente. E ta pone integridad di hende na peliger, ningun banda ta sali cana, e ta hinca hende den debe, e ta pone hende perde propiedad,e ta trece trauma den famia.
Divorcio ta causa odio cu hopi biaha por yega te na morto, divorcio ta hole stinki, den un divorcio diabel ta gosa pasobra diabel ta odia matrimonio manera cu Dios a instrui.
Bo tabata cuanto hoben awe conoce prison pa motibo cu nan mayor a dicidi di divorcia?
Bo tabata sa cu e bagamunderia di adulterio tin hopi famia den dolor?
Bo tabata sa sa cuanto dolor ta haci ora hende mester maltrata otro fisicamente, verbalmente of psicologimente te ora yega na divorcio?
Hopi ta cay den paranda, alcohol y droga y asina tambe ta yega na divorcio pasobra e bida ey ta bira insoportabel, pero nan no ta tene cuenta cu nan ta destrui nan mes y nan famia.
Divorcio no ta un wega , divorcio no ta di Dios, Ta facil yega na un abogado pone placa y bisa mi kier divorcia, y hasta tin biaha ganja, of keda para riba un falta di pordon, of manipulacion, pa asina logra un divorcio.
Hopi hende no ta tene cuenta, of no sa, of ta haci curason duro, pero despues ta lamenta, den divorcio no tin ganador.
E figura di e mama autentico y berdadero e mama biologico semper ta keda un necesidad den cas.
E figura di e tata autentico y berdadero e tata biologico semper ta keda un necesidad den cas.
Hende por purba tapa solo cu un dede,purba haci tur tipo di reemplaso, pero pa motibo di divorcio, sociedad ta sinti dolor.
Hopi hende no kier tende cu matrimonio ta pilar di sociedad, tur caminda bo ta tende di e pilar di nos economia, awor con ta para cu e pilar di nos sociedad cual ta matrimonio.
Acaso hende no ta ripara kico ta pasando, acaso hende no ta ripara cu cada divorcio ta manda nos atras,y cada divorcio ta un caida pa sociedad.
Den e buki di Malakias 2:16 ta para scirbi: Pasobra Mi ta odia divorcio Senjor e Dios di Israel , ta bisa , y esun cu ta tapa su panja cu violencia, e Senjor di ehercitonan ta bisa,Pesey pone atencion na boso spirito pa boso no trata cu traicion.
Senjor ta contra e maltrato entre pareha, Senjor ta contra manipulacion, Senjor ta contra adulterio of mihor bisa āCortamento di oreaā.
Den Mateo 5 :32 ta para scirbi Hesus ta bisa: Ma Ami ta bisa boso;Cu ken cu divorcia su esposa,si no ta motibo di inmoralidad, ta haci e muhe comete adulterio,y ken cu casa cu un muher divorcia ta comete adulterio.
Den Mateo 19:6 ta para scirbi : Asina anto nan no ta dos mas, sino un carni,Pesey loke Dios a uni, no laga ningun hende separa.
Marco 10:9 ta para scirbi: Pesey loke Dios a uni no laga ningun hende separa.
Tene cuenta cu enemigo e diabel, e colebra bieu y malbado, no ta amigo di matrimonio, tampoco amigo di famia, e no ta gusta union, matrimonio ta demostra e union di Cristo y su Iglesia.
Laga nos pone bon atecion na esaki como pueblo y no laga maldad y inmoralidad sigi destrui matrimonio y famia.
Sinceramente, Pastor Marcel Balootje
