Recientemente, Gobierno a presenta e apertura di e zona di desperdicio na Barcadera como un paso firme den direccion di un Aruba mas limpi. Relaciona cu esaki, Parlamentario Hendrik Tevreden a señala cu, aunke tur ciudadano kier un isla limpi, e debate berdadero ta bay mas profundo.
Segun Tevreden, e pregunta crucial cu mester wordo contesta ta si nos ta invertiendo den un sistema moderno y sostenibel di maneho di desperdicio, of si simplemente ta improvisando cu placa di pueblo. El a aclara cu e no ta cuestiona e intencion di mantene Aruba limpi, sino e falta di transparencia y e manera con un proyecto di importancia nacional ta wordo implementa sin cu Parlamento tin conocemento di e detayenan principal.
E parlamentario a enfatisa cu, te awe, falta claridad total riba cua modelo di maneho di desperdicio Aruba lo bay aplica. El a señala cu, maske tin un sitio pa entrega desperdicio, e gran pregunta ta kico ta pasa despues cu e sushi wordo descarga. Tevreden a cuestiona si e desperdicio realmente ta wordo separa, recicla, reutilisa of exporta, of si finalmente tur cos ta termina den e mesun dump. E parlamentario a enfatisa cu, mientrastanto no tin e detayenan ey, ta dificil pa papia di sostenibilidad.
Organisacionnan internacional ta exigi un plan integral
Organisacionnan internacional manera Banco Mundial, UNEP y OECD ta yega na e mesun conclusion: un maneho moderno di desperdicio no ta cuminsa cu simplemente un container di sushi, sino cu un sistema structura. Den e cuadro aki, e parlamentario a splica cu Aruba tin mester di un maneho cu ta prioritisa reduccion di desperdicio, separacion na e fuente, reciclahe, reutilisacion, tratamento responsabel y midimento di resultado; aspectonan cu ta precisamente loke falta den e discusion publico aki.
Preocupacion pa e uzo di fondonan di ATA
Un punto di atencion serio den e debate actual ta e uzo di e fondonan di Aruba Tourism Authority (ATA). Maske ATA tin un rol crucial den promocion di turismo, Parlamento tin e derecho y e deber di cuestiona: te unda e responsabilidad di e entidad aki ta yega? Si ATA cuminsa financia proyectonan cu structuralmente ta cay bou di e responsabilidad directo di Gobierno, e capacidad di Parlamento pa eherce un control efectivo riba e gastonan ey ta keda debilita.
Tevreden a aclara cu esaki no ta un atake contra ATA, ya cu e entidad ta cumpli cu su mision den promocion di Aruba. Sinembargo, el a señala cu Parlamento mester actua cu diligencia ora entidadnan cu no ta cay bou di e mesun nivel di control parlamentario ta cuminsa financia mas y mas tareanan publico. Segun e parlamentario, transparencia no por depende unicamente di bon intencion, sino cu e mester wordo garantisa door di un sistema di control structural.
Relaciona cu esaki, e parlamentario a cuestiona kico lo pasa si den futuro ATA cambia su prioridadnan of no tin e mesun disponibilidad financiero. Tevreden kier sa si e proyecto aki tin un fondo permanente, of si e costo lo cay por completo riba e contribuyente. El a accentua cu sostenibilidad real no ta djis inicia un proyecto awe, sino garantisa cu e proyecto por sigui funciona financieramente y institucionalmente a largo plaso.
Falta di un vision nacional pa desperdicio
E parlamentario a enfatisa cu Aruba mester di un vision nacional pa desperdicio. Maske e ta reconoce cu e minister anterior no a laga e situacion aki cla, Tevreden a splica cu Aruba mester hopi mas cu simplemente un luga pa entrega sushi. Mester stipula metanan cla pa reduci desperdicio, aumenta reciclahe, stimula reutilisacion, maneha desperdicio peligroso, frena dumpnan ilegal y prepara e isla pa e reto cu turismo y e crecimento población ta trece cun’e.
Pa e rason aki, Parlamento lo sigui haci e preguntanan necesario. Tevreden a duna di conoce cu el a entrega caba 190 pregunta for di diferente angulo riba e tema aki y ta sperando riba e contestanan di e ministernan concerni. El a conclui cu e cuestionamento aki no ta pasobra e ta contra progreso, sino precisamente pasobra progreso mester wordo construi riba transparencia, responsabilidad y bon gobernacion.
Un isla limpi ta importante, pero un pais cu su finanzas na ordo, cu ta evita debe y malgastamento, ta crucial pa por resta fondo pa inversionnan concreto den futuro.
