Den un entrevista cu e corant Hulandes Katholiek Nieuwsblad, a duna di conoce cu e Frères di La Salle, cu a yega Aruba na aña 1937 pa realisa trabao di misionero, a laga un herencia cu ta bisto ainda den e comunidad. Maske e ultimo ruman a bandona e isla mas di binti aña pasa, Tito Sapuana y Diet Booi kier mantene e memoria di e broedernan aki bibo pa medio di un grupo di trabao forma pa ex-alumno y personanan cu kier duna e herencia aki mas visibilidad. En total, 62 broeder a sirbi na Aruba te ora e ultimo tresnan a regresa Hulanda definitivamente na aña 2000 debi na nan edad.
E frerenan a asumi mando di e scolnan existente, a funda institucionnan nobo y a duna les den casi tur distrito. E educacion tabata completamente na Hulandes, loke a facilita cu e alumnonan por a sigui studia na Europa mas lihe. Booi, kende tin 63 aña bibando na Aruba y tin un gran trayectoria den sector social, a splica den e entrevista aki cu e impacto ta bay mas leu di enseñansa. E generacion mas bieu ta corda e frerenan aki cu hopi aprecio, ya cu nan a yuda forma un sociedad stabil; hopi alumno a drenta den profesionnan medico, den sacerdocio of den politica, y uno di nan a bira Gobernador di Aruba. Nan metodo tabata combina educacion cu atencion personal.
Ex-alumno Tito Sapuana a conta cu e rumannan tabata bay mas aya di klas. El a recorda frère Eduardo cu tabata conta storia cu tabata capta atencion di e alumnonan, y frère Gerardo cu a organisa ekiponan di deporte pa asina integra tur mucha. Riba tereno cultural, frère Alexius a funda e grupo di canto “E Troepialen”, cu a crece cu obra di teatro y popchi. Ademas, e ruman a stimula uzo di e idioma local den canticanan, loke a contribui na creacion di e Himno di Aruba.
Aworaki, e antiguo klooster “Huize de La Salle” ta sede di Universidad di Aruba, y e otro edificionan a haya destino social, manera un cas di cuido y un centro pa muhenan den necesidad. Booi a splica cu, maske nan no ta cera wowo pa e scandalnan di abuso cu hopi biaha ta wordo asocia cu religioso, e contribucion positivo di e frerenan na Aruba ta un realidad. E grupo di trabao tin planea pa lansa tres proyecto pa aña 2027: un monumento na un sitio historico, un buki di memoria y un documental, pa asina e futuro generacionnan sa e balor di e frerenan aki pa e isla.
