Herencia ta un bendicion, y no un motibo pa pleita

E ta algo cu semper e enemigo lo usa pa trece desunion den famia, si esnan cu ta traha e testament no tene bon cuenta cu esey.

Herencia ta locual mayornan ta laga atras pa nan yuinan, ningun yiu a traha pe, ningun yiu tabata tey ora e mayornan a lucha, ningun yiu a participa den e sacrificio, pero ora di herencia, si e asunto no ta bon reparti, e ta trece envidia, pleito , desunion, bruheria ta cay aden, falsedad, y locual ta mas doloroso hasta morto por cay pa motibo di herencia.

Pero alcontrario Dios ta spierta tur hende, for di tempran ken ta esnan cu lo hereda reino di Dios.

Pasobra eynan lo tin yoramento y comemento riba djente, pasobra hopi ta pensa cu nan por pasa Dios un fastball, di biba manera cu nan kier sin tene cuenta cu Dios su mandamento y Dios su naturalesa y kere cu nan lo drenta cielo.

Hopi biaha bo ta tende hende ta papia di otro bisando: “E ta kere cu ta masha santo e ta, e ta kere cu e ta bay cielo,

Laga nos no lubida cu e palabra di Dios ta bisa den Hebreonan 12:14: Aspira pa tin pas cu tur hende, y santificacion , sin cual ningun hende lo mira Senjor.

E condicion pa drenta cielo, no ta hende ta stipule, no ta religion ta stipule, ni tampoco cual iglesia of misa ta dicidi, sino e ta clarisimo para scirbi den e Palabra di Dios.

Awor pa nos tur e ta conta igual, no tin preferencia pa ningun hende, e palabra di Dios ta bisa: Esun cu kere lo ta salba, y esun cu no kere ta condena caba, pasobra e no a kere den e Yiu unigenito di Dios.

Awor ningun caminda tin para scirbi cu bo por drenta cielo via bentana, pasobra ta un porta tin y su nomber ta Hesus Cristo, Hesus a bisa Ami ta e caminda , e berdad y e bida, ni un hende por yega serca e Tata, sino ta pa medio di Mi.

Awor si bo tin Cristo den bo curason, bo ta bisa cu bo conoce, y bo ta sigi biba manera bo kier, bo ta aleha for di Su boluntad, pa bo parandia, bebe, droga , participa den inmoralidad, bo tin chens cu bo ta keda atras, ora E bini pasobra lo bo no ta cla pa bay cune, pasobra bo a trata bo salbacion con cu ta ( Mateo 25:1:13).Y bo no a perservera manera ta scirbi den Mateo 24:13.

Una bes cu bo ta den Cristo, percura di biba pa Cristo, pasobra ta hopi tentacion tin den mundo, e diabel ta cana manera leon cu ta grunja buscando ken e por debora.

Y e obranan di carni ta cos cu hende mester tene cuenta cune, pa bo no ta participa den nan pasobra, lo bo no hereda e reino di Dios, Pablo a scirbi esey den Galationan 5:19-21 pa tur hende tene cuenta cune cu bo no por come for di dos tayo.

No ta pornada ta para scirbi cu e a spierta hende di antemano y e ta bolbe spierta hende di antemano, cu esnan cu ta practica sorto di cosnan asina lo no hereda e reino di Dios.

E Testamento cu Cristo a laga pa nos, no ta wordo habri ora nos muri, pero for di awor cu nos ta na bida, e ta demostra na unda nos ta para, y na unda nos mes ta escohe pa nos pasa bida eterna.

Tene bon cuenta cu Mateo 7:21-23.

Dios tene Misericordia.

Sinceramente, Pastor Marcel Balootje