Placa no ta tur cos, hende ta preocupa mas cu placa cu nan ta preocupa cu Dios y nan salbacion, pero hopi ta gusta laga cos pa ultimo ora, pasobra segun nan ta nan mes ta dicidi pa Dios, y ta lubida cu hende ta planea pero ta Dios ta dicidi.
Awendia materialismo y placa a cambia hende su pensamento cu nan kier pone boluntad di Dios un banda y pretende cu si no tin placa no tin bida, ora nan hanja placa of ora nan tin un promesa di placa, nan ta lubida cas, famia, amistad y tur locual por tin cu haci Dios, pa nan follow the money.
Ta berdad cu hende mester di placa, ta berdad cu Dios mes a bisa cu sodor di bo frenta lo bo gana bo pan di cada dia, pero esey no ta nifica cu necesidad di placa tin cu pone hende hanja beis, y stress, y discucion, y manipulacion, pasobra placa ta temporal . Pero nos Dios ta eterno.
Ta para scirbi den 2 Timoteo 3:1-5 cu nos ta bibando den tempo trabahoso,cu hende lo bira stimado di nan mes,stimado di placa, di un forma cu hende ta bandona Dios, pa motibo di placa y hopi biaha esey ta sosode sin cu hende nota, tur cos ta cuminsa di un forma manera hende no ta alcansa, y despues cu nan wak atras nan lo ripara cu nan a aleha for di Dios, y a fria pa cosnan di Dios.
Si dos hende ta biba hunto un mester apoya e otro riba e caminda di Dios, sea ta den un matrimonio of simpelmente den famia, nos cu ta prohimo mester stima otro y sostene otro pa no bandona e caminda di Dios pa nada, pero haci tur esfuerso pa keda riba caminda.Pasobra pega na Dios nos por tur cos ,separa for di Dios , nos no por nada (Juan 15:5).
E ta keda un conducta hopi infantil, ora un hende ta pensa cu si e aparta for di caminda di Dios, esey ta nifica cu e ta haci dolor na otro, esey ta parce asina pero e no ta berdad, pasobra nos tin cu corda cu na final ta nos tur mester duna cuenta na Dios, personalmente.
Si un hende aleha for di caminda di Dios, su rumannan por sinti su falta na iglesia, pero e consecuencia lo bini pe personalmente, pasobra e enemigo ta loer.
Diripiente e cosnan di pasado ta cuminsa bini bek, pasobra a bini un scheur den su muraya di proteccion, un porta cu e mes a laga habri, e humamento por bini bek, e bebemento tambe por bini bek e falta di respet pa su mes y pa hende por bini bek, e palabra malo ta wordo activa, y asina e persona mes lo mira cu e tempo precioso cu e tabatin pa Dios, e bira solamente un palabra ,pero e no ta un hacidor mas.
Respet pa Dios y pa nos mes y pa nos famia ta di gran balor:
Respet entre esposo y esposa ( Efesionan 5:33).
Respet entre mayor y yiu ( Efesionan 6:1-4).
Respet den Famia ( Romanonan 12;10).
Respet special pa bo esposa (1 Pedro 3:7).
Sea tendedo y cumplido di e palabra ( Santiago 1:19).
Respeta otro den priva y den publico.
Respet tambe ta forma parti di nos integridad.
Palabra sushi ta un indicacion fuerte cu Respet no tey.
Ora nos tin temor di Dios, respet ta refleha den nos bida, den nos cas , famia y matrimonio.
Respet no por wordo negocia, e mester wordo balora.
Sinceramente, Pastor Marcel Balootje
