Minister di Finansa, Asuntonan Economico y Sector Primario, mr. Geoffrey Wever, hunto cu Staatssecretaris di Relacionnan den Reino y Gobernacion Efectivo, Eric van der Burg, a bishita Vaper Trading VBA na Balashi, unda a tuma lugar un momento historico: e entrego di e prome prestamo cu a wordo facilita bou di BMKB-ACS, den colaboracion cu Qredits.
BMKB- ACS ta para pa Borgstelling MKB-kredieten Aruba, Curaçao en Sint Maarten. BMKB-ACS ta un programa cu ta yuda companianan cu tin bon plannan, pero cu no semper tin suficiente garantia, pa haña un prestamo serca banco of institucion financiero. Gobierno Hulandes ta cubri parti di e riesgo, pa e institu financiero por presta e compania placa den un manera mas facil.
E bishita y entrega di e cheque na Vaper Trading ta marca un paso concreto den e compromiso di Gobierno pa haci financiamiento mas accesibel pa companianan local, cu hopi biaha ta topa obstaculo pa haya credito via bancanan tradicional.
Vaper Trading VBA, ta un compania cu a wordo establece na 2021, ta activo como wholesaler di productonan pa vehiculo, frozen y mercancia seco. Cu e financiamiento aki, e compania lo por sigui crece, amplia nan operacionnan y contribui mas ainda na economia local.
Durante e momento, Ministro Wever a enfatisa cu acceso na financiamiento ta uno di e pilarnan clave pa stimula entrepeneurship y diversificacion economico:
“Nos entrepeneurs local tin e vision y e determinacion, pero hopi biaha e acceso na capital ta e barrera di mas difical. Cu instrumentonan manera e BMKB-ACS, nos ta kita un parti di e riesgo, pa asina banconan y institucionnan financiero por sostene mas iniciativanan local cu potencial real.”
E programa BMKB-ACS, adapta pa contexto di Caribe Hulandes, ta ofrece un garantia entre 45% te 67.5% riba prestamonan, loke ta reduci e riesgo pa financiadornan y facilita acceso pa empresanan cu no tin suficiente colateral.
Qredits, cu desde 2017 ta activo na Aruba, ta hunga un rol esencial den e ecosistema di emprendemento, no solamente door di financiamiento, pero tambe coaching y guia empresarial. Te awor, nan a facilita 574 prestamo, representando un total di mas cu AWG 12.2 miyon, cu e meta di yega na e prestamo number 600 den 2026.
Ministro Wever a destaca e importancia di colaboracion entre sector publico y sector priva, enfatizando cu trahando hunto nos por logra pasonan concreto pa e economia di nos pais.
“Esaki ta un ehempel claro di con colaboracion entre gobierno, institucionnan financiero y entrepeneurs por crea impacto tangibel. Nos ta traha pa un economia unda iniciativa privado wordo stimula, sosteni y facilita, pa asina crea mas trabou, mas actividad economico y mas oportunidad pa nos pueblo.”
Minister Wever kier gradici Staatssecretaris Eric van der Burg pa su presencia y sosten y naturalmente Qredits, cu nan apoyo pa e entrepreneurs, y felicita Vaper trading cu e paso importante aki.
Gobierno lo sigui traha riba mehoracion di e clima di negoshi, reduccion di burocracia y creacion di instrumentonan cu ta haci mas facil pa entrepeneurs cuminsa, crece y desarroya nan negoshi na Aruba, y asina contribui na diversifica nos economia.
