Den Corte, Hues a trata e caso penal cu Ministerio Publico a cuminsa contra e homber F. (46), kende ta wordo acusa cu riba 26 December 2025 a maltrata su pareha R.
SOLO DI PUEBLO por a compronde cu e problema a cuminsa door cu e dama R. a yega cas di dos dia di Pasco den oranan di marduga. Hues a confirma e exigencia di Fiscal cu ta trabao pa comunidad y cu F. mester cay bao guia di Reclasering.
DAL PAREHA CU CELLULAR DEN CARA
Hues a puntra F. kico a pasa. Segun F., den su rabia, el a pusha su mokete cu un cellular aden na cara di su pareha R. El a splica Hues cu nan tabata pleita riba e cellular. Ambos tabatin e cellular wanta y F. na dado momento a dal cu R. cu mokete pero no duro. Hues a remarca cu e movecion cu F. a haci den sala di Corte, ta mustra cu el a dal cu forza. F. a bisa cu e no sa si ta su mokete of e cellular a dal R. na su boca. Riba pregunta di Hues, F. a splica cu nan tabata ranca na e cellular y na dado momento su mokete a sali. Hues a bisa cu R. a bisa Polis cu a surgi un discusion caminda F. a ranca e cellular di su man y cu un cuchiu F. tabata kibra e screen di e cellular. R. a purba kita e cellular y F. a dal’e na su nanishi y boca. R. a bisa Polis cu e no sa si F. a dal’e cu mokete of man habri. F. a bisa Hues cu den su rabia, el a coy un cuchiu y corta e keds cu el a regala R. Despues el a usa e cuchiu pa kibra e cellular. Hues a remarca cu e uso di cuchiu ta haci e asunto serio. Hues a bisa cu tin potret di R. caminda ta mira un corta na su lip. F. a bisa Hues cu e dia ey e tabata bebi y R. a yega cas den oranan di marduga. Esey a causa e discusion. F. a bisa cu e ta lamenta loke a pasa y cu ainda nan ta cu otro y cu nan tin 2 yiu. Nan a papia e asunto y tur cos ta normalisa.
FISCAL
Fiscal a bisa Hues cu Polis a haya e pareha R. hopi emocional y tabata yora. Polis a mira cu R. tabatin su lipnan hincha y un corta na su lip. F. a admiti cu tabatin un discusion y cu na dado momento su man a sali pa pusha R. Tur e cos aki a sosode despues cu F. a kibra e cellular di R. Fiscal ta considera esaki un maltrato cu arma. El a bisa cu F. a maltrata su pareha cu kende e tin 2 yiu. Fiscal ta haya cu F. a tacha e integridad di e dama R. y a causa momento di inseguridad. Fiscal a bisa cu e ta lamenta cu F. no a presenta na Tom zitting. Fiscal ta haya cu ta necesario pa F. sigui curso di Reclasering pa evita un caso similar. Fiscal a exigi 60 ora di trabao pa comunidad di cual 30 ora ta condicional cu 2 aña prueba. Tambe Fiscal a exigi cu F. lo mester cay bou guia di Reclasering.
ABOGADO
Abogado mr. Emerencia a bisa Hues cu tabatin un discusion y na dado momento F. a haci movecion pa hala R. atras y esey a causa cu a dal R. den cara. E abogado a pidi Hues pa tene cuenta cu F. ta mira pa su dos yiunan cu ta menor di edad. E ta haya cu Reclasering lo por yega na un areglo cu F. pa cu e trabao pa comunidad.
SENTENCIA
Hues a sera tratamento di e caso y dicta sentencia. Hues ta haya proba cu .F. a haci maltrato cu arma. Hues a bisa cu e ta comparti punto di bista di abogado mr. Emerencia, kende a bisa cu ta un movecion so F. a haci. Hues ta haya cu un castigo di trabao pa comunidad, ta na su lugar. Hues a confirma exigencia di Fiscal. Hues a condena F. na 60 ora di trabao pa comunidad di cual 30 ora ta condicional cu 2 aña di prueba. Hues a bisa cu F. mester sigui indicacionnan di Reclasering.
