Diamars mainta trempan Prome Minister Mike Eman, hunto cu Astrid Vries, Presidente di Comision di Bario Mabon, Alex Hozee, Liaison Officer for Civil-Military Cooperation (CIMIC) di Marina Real Hulandes, y Comandante Henk Buijs di Marinierskazerne Savaneta, a reuni na un area deportivo, recreativo cu ta den un estado di abandono. Esaki den conexion pa preparacion pa un accion di limpiesa cu lo tuma luga diasabra 25 di juli, durante Dia Nacional pa Cuida Aruba. Prome Minister a enfatisa cu Dia Nacional pa Cuida Aruba no ta solamente un dia pa limpiesa di nos isla, sino tambe un yamada na tur ciudadano pa reflexiona riba nan responsabilidad comparti pa cuida nos pida baranca. “Nos ta bendiciona di por biba na Aruba. Cu esey ta bin tambe un responsabilidad pa mantene nos isla limpi, bunita y bon cuida, no solamente pa nos mes, sino tambe pa e generacionnan cu lo bin despues. Ora nos traha hunto, nos ta fortalece e solidaridad den nos comunidad y nos ta duna un bon ehempel pa futuro.” Prome Minister a gradici Astrid Vries, e habitantenan di Mabon y tur boluntario cu a tuma e liderazgo pa haci e proyecto aki posibel.
No djis limpiesa; pero un vision pa restaura un area recreativo y deportivo bek
Durante e recorido, e delegacion a evalua e condicion actual di e parke y e diferente facilidad deportivo y recreativo, pa determina e trabounan cu mester wordo haci pa recupera e area y debolbe Parke Mabon den e estado bunita y funcional cu e comunidad merece. Prome Minister Mike Eman a destaca cu e proyecto na Mabon ta un di e proyectonan special cu lo forma parti di Dia Nacional pa Cuida Aruba. E area aki tin un bunita parke, un tereno di softball, baseball y varios facilidad deportivo y recreativo. Sinembargo, ultimo aña e area a sufri di falta di mantencion y hopi di e instalacionnan a deteriora. Cu e iniciativa aki Gobierno kier duna e espacio publico un comienso nobo pa e comunidad di Mabon por disfruta di dje atrobe.
Marina Real Hulandes ta un bon bisiña
Durante e reunion, Comandante di Marinierskazerne Savaneta Henk Buijs a confirma e compromiso cu Marina Real Hulandes lo contribui activamente na e dia di limpiesa. Riba peticion di Prome Minister Mike Eman, Comandante Buijs a mira con Marinierskazerne Savaneta por contribui. Aunke cu ta un periodo di vakantie, nan lo bin cu un grupo di militar pa yuda, y e contribucion lo ta mas grandi ainda cu inicialmente a planea. Aki nan lo duna un empuhe den e bon direccion y pone un granito di arena den e esfuerso comparti.
Tambe tabata presente Alex Hozee, Liaison Officer for Civil-Military Cooperation (CIMIC), kende diariamente ta fortalece cooperacion entre Marina Real Hulandes, Gobierno di Aruba y comunidad den diferente iniciativa cu ta beneficia nos isla y ta cla pa haci e parke limpi.
Sector comercial ta keda sostene iniciativa di haci nos isla limpi
Werkgevers Arubaanse Bouwnijverheid (WAB) tambe a confirma su sosten na e iniciativa. Gerco Rijkers, General Manager di Algemeen Bouwbedrijf Albo Aruba N.V. y Presidente di WAB, kende ta representa un grupo grandi di dunado di trabou den sector di contruccion riba nos isla a indica cu e asociacion ta completamente comprometi cu e proyecto y lo aporta personal, ekipo y makinaria pa yuda cu e trabaonan na Mabon.
Bario Mabon mester bira un ehempel pa henter nos isla; esaki ta e deseo di e comision di desaroyo y bienestar di Mabon. E comision di Mabon ta contento cu e limpiesa ta bay tuma luga y despues nan tin e confiansa den e ambicionnan. Dia Nacional pa Cuida Aruba ta un invitacion henter nos isla participa. Hunto nos por mantene Aruba limpi, bunita y bon cuida, pasobra cuida Aruba ta un responsabilidad comparti di nos tur.
