Tur cos cu hende ta haci Dios ta mira, pasobra nada ta scondi pa Dios, pesey ora nos yega dilanti di Dios , nos buki di bida ta wordo habri pa tur hende hanja locual cu nan ta merece, tanto pa e bon of pa e malo cu nan a haci den e curpa aki, pasobra tur hende mester duna cuenta na Dios.
Dios a crea tur hende segun su imagen y semehansa, y Dios a demostra cu E stima tur hende igual, tanto estan cu ta aprecia Dios, como esnan cu ta rechasa Dios, E a entrega Su Yiu unigenito pa ken cu ker den dj’E no bay perdi, ma tin bida eterna.
Esun cu kere lo ta salba, esun cu no kere lo ta condena. Asina ta cu hende mes ta dicidi pa salbacion of pa condenacion, pero Dios for di principio conoce tur curason, pasobra ta Dios ta e unico creador cu a forma nos tur den barica di nos mama.
Awendia nos ta mira con hende ta laga mundo y pasionan lastra nan bay cune,hende mes ta laga droga y alcohol destrui nan , pasobra nan tin boluntad pa bisa no y keda leu for di e asunto.
Wak con hende ta laga inmoralidad domina nan bida, y wak con hende ta permiti diabel horta nan sonjo. Pasobra wak con duro hende ta traha pa yega na un cas, pero despues pa motibo di pasion baho, sinberguensa y bagamunderia, ta kibra un matrimonio, bandona nan propio yuinan sin corda promesa cu nan a haci ma Dios.
Hende ta busca tur conseho mundano, y caba Dios ta serca, E ta na mesun lugar, Dios no a cambia,no tin ni un situacion cu e no por saca bo for di dje.
Dios ta cla pa restora bo bida, basta abo dune su prome lugar den bo bida, pasobra Dios merece.
Esaki ta mandatoy promesa di Dios; Pesey bay y haci tur e nacionanan disipel di Mi, y batisa nan den nomber di e Tata, y di e Yiu, y di E Spirito Santo. Y asina sinja nan pa cumpli,cu tur loke mi a ordena boso, y mira ,Mi ta cu boso semper te na fin di mundo. ( Mateo 28;19-20).
Y wak bon kico Cristo Hesus ta bisa nos den Juan 14:1-4 ; No laga boso curason bira intrankil, kere den Dios, kere tambe den Mi. Den cas di Mi Tata tin hopi lugar di biba, si no tabata asina, lo Mi a bisa boso,pasobra Mi ta bay pa prepara un lugar pa boso. Y ora mi bay y prepara un lugar pa boso,lo mi bin atrobe y ricibi boso serca Mi, pa caminda Ami ta,boso tambe por ta. Y boso sa unda Mi ta bay, y e caminda boso sa.
Den Salmo 121 ta para scirbi; Senjor ta Bo wardado, Senjor ta bo sombra na bo man drechi. Senjor lo proteha bo di tur maldad, E lo warda bo alma.Senjor lo warda bo salida y bo entrada for di awor y pa semper.
Juan 15:5 ta bisa lo siguiente; Ami ta e mata di wijndruif , boso ta e ramanan,esun cu keda den Mi, y Ami den dje,esey ta duna hopi fruta,pasobra separa di Mi,boso no por haci nada.
Ora un hende ta pega na Dios , tur hende lo nota e frutanan cu ta sali for di su bida, y reconoce door di e frutanan cu e hende ey ta pega cu Dios. Ta pesey ora nos ta den Cristo Hesus nos mester para firme, tur momento.
Sinceramente, Pastor Marcel Balootje
