Parlamentario Endy Croes: E weya di steam di AVP ta totando! Dowers pa Prome Minister y Candelaria como minister di Husticia mientras Heyliger y Marlon Sneek ta cushinando

Parlamentario Endy Croes a splika cu den politica bo mester ta atento y sigui esaki di serca na tur momento. Aunke ta trata di combersacionnan interno entre partidonan pero semper ta ideal pa Aruba por wordo sirbi na e mihor manera posibel. Desde 2026 tin (2) desaroyo nobo interno ta hungando un rol den e gobernacion aki. (1) Momento Mike Eman a anucia cu september proximo e lo retira como Lider di AVP y lo pushando Wendrick Cecilia pa bira e proximo Lider di AVP y (2)  e anucio sopresivo sin avisa su Vice Prome Minister  Gerlien Croes di cambio di Prome Minister per 1 di Januari 2027.

Kiko ta e rancamento di ciboyo:

Combersacionnan interno a inicia den AVP. Mientras tin tema y topiconan di un interes hopi halto manera HOFA y tambe desaroyo petrolero riba mesa, nos tin un Prome Minister Mike Eman kende solamente a planta y piki sushi den 18 luna na mando y awor riba dije ta anucia su retiro como Lider di AVP y Prome Minister di pais Aruba. Den wowo di pueblo esaki ta cay manera un cobarde cu ta “bende nos autonomia cu Hulanda” manera un traidor y ladron di anochi y baha na awa. Hopi tristo pero nos lo bin bek riba esaki. Den AVP tin e tendencia cu Wendrick Cecilia por bira Lider temporal di partido pero no lo asumi e puesto di Prome Minister como cu e sapato ey ta demasiado grandi pe. Barancanan “paden” den AVP a propone pa Dowers bira e siguiente Prome Minister. Dowers na su turno a haña e idea uno magnifico y simpatico unda su persona tin e deseo ferviente pa ocupa e posicion aki atleast un biaha den su carera politico prome cu e retira. 

Proposicion pa Candelaria tuma cartera di Dowers

Pa 1 di Januari 2027 AVP lo kier pusha Dowers como Prome Minister y Candelaria como minister di Husticia. Internamente den AVP a cuminsa un guerra. Marlon Sneek a cuminsa sinti cu e tambe tin e derecho di asumi un of mas cartera como minister. Segun fuente interno Marlon Sneek a sapatia “paden” splikando cu desde 2010 e ta halando garoshi pa AVP hasta den e momentonan di mas malo y dificil di e partido. Segun Sneek ora AVP a crea e Mega Debe pa pais Aruba (2010-2017) y momento cu x ministernan manera Benny Sevinger y Paul Croes a horta pais Aruba ferozmente el a para banda di e x ministernan corupto di AVP y defende nan.  Hasta Marlon Sneek a splika cu su persona a presenta un ley den Parlamento pa Benny y Paul por keda cobra nan salario di minister of como Parlamentario siendo nan tabata deteni y sera den KIA. Segun Marlon Sneek e berguensa cu  e mester a pasa cargando AVP ta enolvidabel momento Raad van Advies su conseho tabata devastador y Parlamento mester a rechasa su ley. Pues Marlon a laga sa cu el a bay e extra mile pa AVP y su sacrificio tabata grandi pa partido y awor AVP tin e deber pa cumpli bek cune. 

Di otro banda Helyiger a laga sa cu un biaha ta horca double 6:

A resulta cu Parlamentario Heyliger tambe tin un aspiracion grandi pa bira Minister. Momento cu Baba Herde a asumi e puesto di minister tambe tabata tin un “discusion” basta grandi interno den AVP. E tempo aya Heyliger corectamente a protesta cu Baba Herde no a bay riba lista y no a campaña y no merese bira minister dilanti esnan cu si a bay elecion. Akinan “Topnan” den AVP mester a combense Heyliger pa e “give in” pa scapa gobierno den salida. Heyliger cu hopi dolor a mira e oportunidad di “oro” pasa bou su nanishi sacrificando su mes y San Nicolas cu a carga AVP den voto. Segun Heyliger y corectamente cu San Nicolas mester por  tin e honor pa haña lo minimo (1) minister den henter e gobierno aki. Otro a bisa cu Heyliger a laga San Nicolas na caya y e no mester a acepta e insulto cu Baba ta pasa su dilanti. Pa con zuur e pilder ey tabata ta Heyliger a haye ta gulie. Por a compronde cu Heyliger lo a laga sa cu den wega di domino ta (1) biaha bo ta horca double 6. Pues ta un biaha su propio hendenan a “change” y e no lo permiti esaki pasa atrobe Januari proximo. Candelaria “zo y zo” no por pasa su dilanti paso e no a bay elecion. Segun Heyliger e dolor cu Marlon Sneek lo a expresa  alrespecto “halado di garoshi” tambe ta algo di pasado y no ta conta mas. Sea Heyliger ta tuma e cartera di Husticia of ta shobbel e carteranan unda Heyliger su aspiracion primordial ta Energia. Innercirlce y Topgun di AVP no sa faya den nan informacion. Nos lo keda pendiente y lo sigui e desaroyo aki di serca e di dos mitar di e anja aki Croes ta termina bisando. E weya ta totando!