Nos animalnan ta sufriendo. Tur dia, cacho y pushi bandona ta wordo mira riba caya, den solo y den awa, buscando cuminda, proteccion y un tiki cariño. Hopi di nan ta biba den peliger constante, exponi na hamber, enfermedad, accident di trafico y maltrato. E situacion aki no solamente ta afecta bienestar di e animalnan, pero tambe ta impacta seguridad di hende y otro animalnan, salubridad y calidad di bida den nos comunidad.
E problema aki no a surgi di un dia pa otro. E ta resultado di abandono, reproduccion sin control y falta di responsabilidad di ciudadanonan pa cu nan mascota.
P’esey, Gobierno di Aruba, pa medio di Ministerio di Salud, Cuido di Adulto Mayor y Maneho di Adiccion, hunto cu Directie Volksgezondheid (DVG) ta anuncia cu preparacionnan pa un maneho nobo pa bienestar di animal y comunidad henter ta den su fase final. E maneho nobo lo enfoca riba promove responsabilidad, preveni abandono y maneha y regula animalnan riba caya segun ley stipula, pa asina crea un Aruba mas sigur pa hende y animal.
Durante e siguiente simannan, comunidad lo wordo informa paso pa paso riba e diferente aspecto di e maneho nobo y riba kico realmente ta nifica ser un doño di mascota responsabel.
E campaña #No Mas Sufrimento, Mas Doño di Mascota Responsabel ta invita tur ciudadano pa forma parti di e cambio. Pasobra solucion di e problema no ta depende solamente di ley y Gobierno, pero tambe di compromiso y responsabilidad di cada ciudadano cu ta biba na Aruba.
Sea bo tambe un doño di mascota responsabel. Cada acto di responsabilidad ta salba un bida. Planta amor, brinda speransa y proteha bienestar di nos animalnan.
Together for a Harmonious Community, One Responsible Pet Owner at a Time.
