Durante e Reunion Publico den Parlamento tocante maneho di desperdicio, Parlamentario Endy Croes a cuestiona Minister Wendrick Cicilia seriamente riba un contracto di 2.1 miyon florin pa aña cu Aruba Tourism Authority (ATA) a otorga na e compania Ecotech. Segun Croes, e acuerdo aki pa e proyecto “Baki den Bario” na Barcadera a wordo firma sin cumpli cu e proceso obligatorio di destaho publico, violando Artikel 21 di e Landsverordening instelling ATA y e reglanan di bon gobernacion.
Conflicto di interes
Croes a splica cu dia 30 di april 2026, e Presidente di Board di ATA, señora Jo-Anne Arends, a firma e peticion oficial (cu number di referencia 71026010) dirigi na Minister Cicilia pa aproba e suma di Afl. 2.108.128 pa e oferta di Ecotech pa e zona di desperdicio permanente na Barcadera.
E parlamentario a aclara cu e no ta cuestiona e capacidad ni e profesionalismo di señora Arends, sino e structura di e decision. Como cu e Presidente di Board di ATA ta empleado tambe di un compania cu ta cay bou di e mesun grupo Meta Corp cu ta doño di Ecotech, Croes ta considera cu aki tin un situacion di conflicto di interes. Durante e reunion, e minister no a duna un contesta directo riba e punto aki. Segun Croes, pa garantisa maximo transparencia den e proceso, e peticion por a wordo firma pa e vice-presidente di e directiva.
Falta di Cumplimento cu ley
Banda di e aspecto di conflicto di interes, Parlamentario Endy Croes a señala un falta di cumplimento cu e reglanan di destaho publico:
- Landsverordening instelling ATA: Artikel 21 di e ley aki ta stipula cu e reglanan di destaho cu ta conta pa Pais Aruba ta aplicabel tambe pa ATA.
- Aanbestedingsverordening 2026: Desde 1 di januari 2026, e regulacion nobo di destaho a drenta na vigor, cual ta exigi cu tur proyecto cu ta supera Afl. 200.000 mester cana e procedura di un destaho publico.
Croes a remarca cu, apesar cu e proyecto ta balora na 2.1 miyon florin pa aña, no a organisa un destaho publico, cual ta un violacion di e reglanan di bon gobernacion y di e ley di ATA mes.
Preocupacion pa e rol di Serlimar y e tareanan primario di ATA
E parlamentario ta lamenta cu e tipo di decisionnan aki ta tuma luga, mientras e compania estatal di desperdicio, Serlimar, ta wordo exclui di e proceso. Ademas, Croes a remarca cu maneho di desperdicio ta cay pafor di e tareanan primario (core business) di ATA.
Pa enfatisa e importancia di integridad den e maneho gubernamental, Croes a conclui bisando cu: “Transparencia, bon gobernacion y e respet pa ley mester ta e pilar di tur decision publico pa garantisa e confiansa di comunidad.”
