Partido Patriotico di Aruba (PPA) ta prepara pa habri un capitulo nobo na Aruba cu e reconstruccion di su Centro Patriotico San Nicolas, un edificio cu pa hopi aña a forma parti di e historia politico y social di e distrito. Durante un bishita na e sitio, lider di fraccion di PPA den Parlamento, Eduard Pieters, hunto cu miembro di directiva di partido Michael Bernabela, a confirma cu e proyecto a drenta su fase final di preparacion y cu e trabounan di reconstruccion lo cuminsa pronto. Segun Pieters, e edificio no ta solamente un local di partido. E ta un simbolo historico cu PPA kier debolbe na comunidad di San Nicolas.
“E lo bira un centro importante pa e distrito aki, un lugar unda pueblo por reuni, haya informacion y participa den desaroyo di nos pais.”
Segun e parlamentario, e renobacion ta forma parti di un vision mas amplio, pa fortalece e presencia di PPA den San Nicolas y crea un espacio, unda comunidad por reuni pa diferente actividad, dialogo y encuentro. Pieters a bisa cu den e ultimo dianan, nan a dedica tempo na e detayenan final di e proyecto, incluyendo e reunionnan cu e contratista, cu lo dirigi e reconstruccion.
“Nos ta den e fase final di e preparacion y diseño, pa por cuminsa cu e siguiente trabounan mas liher posibel,” Eduard a expresa.
Entusiasmo cu e proyecto
Michael Bernabela, como miembro di e directiva, tambe a expresa su entusiasmo cu e progreso cu e proyecto ta mustrando. Segun Bernabela, e Centro Patriotico tin un balor special, no solamente pa e simpatisantenan di PPA, sino pa hopi residente di Aruba y particularmente di San Nicolas, cu ta recorda e edificio como un punto di encuentro historico. “E ta un lugar cu tin hopi historia. Tur hende ta bon bini aki. No ta solamente pa San Nicolas, pero pa henter Aruba.”
PPA ta mira e reconstruccion como un inversion den e futuro di e distrito. Segun e dirigentenan, e centro lo sirbi pa e reunionnan politico, e actividadnan informativo, encuentro cu ciudadano y otro iniciativa, cu ta contribui na participacion civico.
Un espacio central y multifuncional
Mientras e obranan ta avansa, e partido tambe lo organisa diferente actividad di recaudacion di fondo pa yuda cubri e gastonan restante di operacion y mantenemento di e edificio.
Segun Pieters, e obhetivo no ta solamente restaura un edificio, sino crea un espacio activo cu lo sigui sirbi comunidad durante hopi aña. “Nos kier p’e Centro Patriotico bira un lugar, unda hende por reuni, comparti idea y sigui traha hunto pa un Aruba mas fuerte.”
Cu e proyecto aki, PPA ta reafirma su compromiso cu Aruba y su intencion di mantene un presencia permanente den e construccion di un nacion, fortaleciendo participacion di comunidad y su relacion cu e pueblo. Mientras e reconstruccion ta den preparacion, e expectativa ta cu proximamente e edificio historico lo habri su portanan pronto, marcando un capitulo nobo como un di e lugarnan cu, pa hopi simpatisante di PPA, ta forma parti di e historia di e partido y comunidad di San Nicolas.
