Pa Dios nada ta imposibel, y tur cos ta posibel pa esun cu ta kere.
Hopi biaha situacion den bida ta pone hende core di pariba bin pabao y di noord bay zuid, y caba e solucion ta den cas mes.
Hopi biaha nos ta sali y papia nos cuenta cu hende, manda hopi whatsup, y caba e contesta ta hunto cu nos.
Dios semper a cumpli cu su promesa, y Dios nunca ta yega laat, Dios no ta bandona ningun hende,
Dios semper tey pa tur hende, pesey Dios su Palabra ta scirbi pa nos tur bisando:
Atrobe mi ta bisa boso, cu si riba tera, dos di boso bay di acuerdo tocante cualkier cos,cu nan pidi,esaki lo wordo haci pa nan door di Mi Tata cu ta den cielo.Pasobra caminda dos of tres ta reuni den Mi nombermi Tata , ey Mi ta meymey di nan. ( Mateo 18:19-20).
Den Genesis 2:24 ta para scirbi; Pesey e homber lo bandona su tata y sU mama y lo uni su mes cu su esposo, y nan lo bira un carni.
Esaki ta un yabi hopi fuerte pa comunica cu Dios,pasobra e union aki, dilanti di Dios, ta nifica cu nan ta di un acuerdo, nan ta kere, y nan ta confia, cu Dios ta capas pa yuda nan.
Ora den un cas e famia ta uni pa haci oracion;
E presencia di Dios ta den e cas.
Caulquier carga of necesidad ta wordo reparti den oracion.
Tur hende ta na altura di tur cos, y e porta pa enemigo ta wordo sera.
Proteccion di Dios lo ta riba henter famia.
Dios ta interveni den tur situacion y Dios ta contesta tur oracion.
E oracion di e husto por hopi.
E union den oracion ta haci forsa dilanti di Dios. ( 2 Cronicanan 7:14).
Ora un famia ta uni den oracion ta mustra cu tin bon liderasgo den e cas.
Claridad y lus di Dios lo briya tur momento.
Un famia cu ta haci oracion hunto, ta pordona otro y ta soporta otro.
Ningun hende por sinti nan mes so, pasobra e union di Dios ta presente.
Nos ta comparti compromiso ( Josue 24:15).
Nos fe ta aumenta ( Deut 6:6-7).
Nos ta duna bon testimonio como mayor.
Tin pas y harmonia den nos hogar, ( Filipensenan 4: 6-7).
Y esey ta algo hopi importante den tur hogar, pasobra nos por tin cas grandi, luho, yena cu tur cos, rondona cu alarma y e cachonan di mas fuerte y defensivo pa proteha nos, pero si paden di e cas no tin pas y harmonia e bida ta bira dificil.
E comunicacion cu Dios, no ta bay cambia, e no ta bira moderno, e no ta bira digital. E ta keda cu oracion, cu alabansa, cu ayuno y cu vigilia e ta keda personal, pasobra ningun aparato traha pa man di hende no por comunica nos cu Dios, ta nos mes mester humiya nos mes y busca cara di Dios.
No tin nada pa reemplasa e necesidad di Dios den nos bida, Su presencia no por wordo imita, su presencia ta haci e diferencia den nos bida, cas, matrimonio y famia. Ta Su presencia ta haci tur cos.
Oracion ta yama presencia di Dios, pasobra oracion ta pidi Dios su intervencion, y Dios mes ta bisa cu ora nos bini serca dje den union e ta scucha y e ta sana tur situacion.
Awor ta e momento, awe ta e dia, pa nos realisa cuanto necesidad nos tin pa haci oracion, cu henter nos Famia.
Sinceramente,
Pastor Marcel Balootje
