Despues cu pa hopi aña e fenomeno di joyriding tabata parce practicamente inexistente na Aruba, e ladronicia di auto aki a lanta cabes atrobe den un forma preocupante.
Casi tur dia ta wordo reporta casonan di hortamento di vehiculo. Un di e casonan mas reciente a tuma lugar diaranson ultimo, ora cu a haya un van abandona den e area di Santa Marta. E caso aki no ta un hecho isola; algun siman pasa caba a keda reporta autonan kima y laga atras den areanan manera Daimari y Kudawecha.
Ademas di e hortamento y joyriding aki, e situacion di inseguridad ta bin compaña pa violencia. Diasabra marduga, tres homber bisti na preto a atraca un ciudadano net ora e tabata yega su cas, saca pistol y bay cu su auto.
Recorte di placa y e impacto riba Polis
Segun criticanan, e aumento aki den criminalidad ta un consecuencia directo di e recortenan presupuestario haci na maart 2025 bao di e gobierno di Gerlien y Dowers, caminda a corta placa di polis.
E situacion aki a laga e cuerpo policial den un posicion unda nan tin mas limitacion pa traha y pa mantene e patruya necesario riba caya.
Awor e pregunta cu hopi ta haci nan mes ta: Ken ta carga e consecuencia di e decisionnan aki?
E contesta ta cla: e pueblo di Aruba, cu awor tin cu biba cu mas temor y inseguridad den nan mesun cas y barionan.
