Cristo Hesus ta e unico cu por a bisa esey, den pasado y su palabra ta sigi bibo pa eternidad, pasobra Su palabra ta berdad, Su promesa nunca a faya, tur locual E a bisa a sosode, ta sosodiendo, pa tur hende por sa cu di berdad ta e Tata den cielo a manda Cristo Hesus.
Tur locual nos ta mira ta sosode, cual awor aki hopi hende ta profetisa, no ta nada nobo, ta djis un confirmacion di locual Hesus a bisa tempo E tabata canando riba e mundo aki. Pasobra ningun hende por pone un fundeshi di locual ta poni caba.
Mateo 24:34 ta para scirbi pasobra ta Hesus papiando: Di berdad Mi ta bisa boso,cu e generacion aki lo no pasa prome cu tur e cosnan aki tuma lugar.
Si bo kier sa kico ta cos cu ta bay pasa? Awel lesa pa bo mes Mateo 24;1-51. Y kere locual ta scirbi.No laga ningun hende ganja bo pasobra e ta interesante pa abo como mayor ta na altura y pone tur bo yuinan na altura.
Marco 13;30 ta bisa mesun cos, Lucas 21:32 ta bisa mesun cos y no ta cos cu ningun hende por cambia.
Hende ta duna tur cos awendia nomber cientifico. Manera Global Warming, El ninjo y La ninja, pero tue cosnan aki ta senjal di binida di nos Senjor Cristo Hesus.Ningun cientifico no por bisa e momento cu un temblor lo tuma lugar.
Pesey Hesus a bisa un palabra cu ta duna seguridad na henter mundo e ta para scirbi den Mateo 11;28 bisando; Bin serca Mi , tur cu ta cansa y carga, y lo Mi duna boso sosiego.
For di tempran e a bisa esey pasobra E tabata sa e tempo cu ta biniendo pa henter mundo, pasobra awor aki mundo a cay den un precupacion hopi grandi, pasobra hopi hende lo no kier biba de complehonan di vivienda di dies of binti piso pa motibo di miedo.
Mientras cu e miedo ta drenta curason di hende, Hesus ta bolbe spierta tur hende den Juan 14:1-4.
Actualmente tin hopi ta aparta for di caminda di Dios, tin grupo nan religioso grandi mundialmente conoci cu No tin Hesus como Senjor y Salvador, nan ta kere den hende cu a muri y keto bay ta den su graf. Nan ta uni cu otro, nan tin placa, nan tin arma,nan ta domina parti di e economia mundial.
Pero tin un palabra cu ta para scirbi den 1 Corintionan 15:50. Awor mi ta bisa esaki, rumannan, cu carni y sanger no por hereda e reino di Dios, ni corupcion no por hereda incorupcion.
E palabra aki ta bolbe corda tur hende cu nada cu bo tin aki na tera no por bay cu bo , ora bo muri, den cielo no tin lugar pa cosnan carnal, manera envidia, rabia, falta di pordon etc.
Y tur locual ta basa riba odio, no ta di Dios, cada hende cu tin otro hende riba su curason, ta un stap mas atras for di Dios. Laga nos tene bon cuenta locual tin para scirbi den 1 Corintionan 6:9-10-11 y Galationan 5:19-21.
Awor con nos tin cu biba den e tempo trabahoso aki,pasobra nos tin di biba prepara pa e binida di Senjor, pa no sosode manera e dies birgen nan cual cinco tabata sabi y cinco tabata bobo, y no a prepara pa e binida di Cristo.
Awel un contesta nos tin cual ta Hebreonan 12:14 : Aspira pa tin pas cu tur hende,y santificacion, sin cual ningun hende lo mira Senjor.
Sinceramente, Pastor Marcel Balootje
