Palabra di Dios ta manda nos stima Dios riba tur cos, y stima nos prohimo manera nos mes.
Na prome lugar ora nos ta stima di curason, pasobra stimacion ta bini di curason, nos no ta pensa pa haci malo na otro, ni tampoco stroba otro, ni pone otro su bida na peliger
Hende ta stima otro, pero diabel no ta stima, pasobra e no por stima, den dje no tin stimacion, e ta e fuente di maldad, orguyo, odio, envidia, egoismo, division, inmoralidad, pasobra e a bini solamente pa horta mata y destrui.( Juan 10:10).
Como yiunan di Dios nos mester stima otro, pasobra amor ta bini di Dios, aunke nos ta mira con leu e sistema di mundo ta bay contra palabra di Dios, nos mester keda den boluntad di Dios cu nos amor un pa otro.
Nos ta bibando den un tempo cu bida di hende a perde balor, respet pa hende a bay for di moda, balornan di famia, y balornan di comunidad a cay abao, e cooperacion di antes , e bista cu un tabata tira pa otro, no tey mas , pasobra awor placa tin hende ciego, y hende no kier ta responsabel mas.
Palabra di Dios ta bisa nos lo siguiente: Pasobra boso a wordo yama pa libertad,rumannan solamente no usa boso libertad, como un oportunidad pa e carni,ma laga un sirbi otro pa medio di amor.( Galationan 5:13).
No laga ningun palabra danino sali for di boso boca,sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende. ( Efesionan 4:29),
Riba tur cos keda ferviente den boso amor pa otro, pasobra amor ta cubri multitud di pica.Duna posada na otro sin murmura. Como cu cada un a ricibi un don special, huse pa sirbi otro como bon mayordomo di e gracia multiforme di Dios.( 1 Pedro 4:8-10).
Pasobra e Yiu di hende no a bin pa wordo sirbi,ma pa sirbi, y pa duna Su bida como preis di rescate pa hopi.( Marco 10:45).
Ta deber di cada mayor di sinja nan yiu con e tin di trata cu hende, pasobra locual e no sinja na chikito, e ta bay trompica na grandi, y e falta di comunicacion, y mal actitud ta haciendo danjo na matrimonio y famia.
Un homber of muher cu no a hanja instruccion den amor di famia for di chiki, na grandi su matrimonio ta corre peliger, pasobra e no sa con pa trata esun cu e ta biba cune.
Ora mayor no ta duna bon ehempel den cas e yiu ta bandona cas, bay casa cu su esposa, pero pa motibo di mal formacion di karakter y actitud violento, cu e a mira for di chiki con su mayornan ta trata cu otro, e ta bay tin hopi sufrimento den su matrimonio,pasobra matrimonio ta algo nobo y e no por draai riba experiencia bieu.( Genesis 2:24).
Laga tur loke boso haci wordo haci cu amor( 1 Corintionan 16:14).
Pesey encurasha otro y edifica otro, mescos cu boso ta haciendo tambe. ( 1 Thesalonisensenan 5:11).
Apresio pa bo prohimo, no solamente ta demostra cu bo tin bon manera y ta respeta, pero e ta demostra cu e amor di Dios ta biba den bo curason, y locual bo curason ta yen di dje, esey ta sali for di bo boca.
No tin nada mas bunita, cu stima, edifica y sirbi otro, musta otro e caminda pa berdad y bida, mustra e caminda di Cristo Hesus cual ta hiba na salbacion y bida eterrna.
Sinceramente, Pastor Marcel Balootje
