Tur cos bon ta wordo logra pa medio di esfuerso , fe y curashi, semper lo tin obstaculo, oposicion, prueba, pa hende por balora locual nan a logra.
Si malbado ta haci esfuerso pa e logra su maldad, cuanto mas esnan cu ta perservera pa haci bon mester tuma curashi cada dia di nobo.
Cristo Hesus ta esun di prome cu nos tin di wak riba dje, su esfuerso, su sufrimento, pa bay na e crus, pa muri y resusita despues di tres dia, y pa awe nos por tin pordon di pica, salbacion y bida eterna.
Noe a haci esfuerso 120 anja , pa e traha e arca, y asina e y su famia por a salba di diluvio.
Moises a haci esfuerso pa por a saca e pueblo di Dios for di Egypto.
Corda cu Moises a purba riba su mes matando un egipcio, pero despues Dios a mande den 40 anja di prueba den desierto.
Despues e mesun Moises a bay Egypto riba orden di Dios, cu palabra di Dios den su boca.
Y no a susha su man cu sanger, pero e a esforsa y Dios a saca e pueblo milagrosamente for di Egypto.
Nelson Mandela den su carrera politico a bay 27 anja cera, pero despues e a sali for di prison y bira presidente di Sur Africa dos biaha, y henter mundo sa awe Sur Africa ta bunita cu vision di Nelson Mandela.
Ora Dios kier haci algo den nos bida no tin nada , pa pare, ora un obra ta di Dios e ta vence tur obstaculo, pasobra Dios ta den e asunto, y E lo kita tur cos for di caminda, pasobra no lubida locual Job a bisa Dios den Job 42:2: Mi sa cu tur cos Bo por y cu ningun di bo propositonan no por wordo stroba.
Nos mester lanta nos yuinan, cu e educacion necesario pa haci esfuerso pa logra den bida, pasobra semper lo existi obstucalo ,material, humano, y hasta diabolico.
Pero para firme y perservera, pasobra victoria ta den man di esnan cu no ta desmaya.
Isaias 14:27 ta duna nos un les di bida bisando: Pasobra e Senjor di ehercitonan a plania,y ken por anula esaki? Y pa loke ta su man extendi, ken por hal’e bek?.
Den Jeremias 32;27 Senjor ta recorda nos tur bisando: Mira , Ami ta Senjor, e Dios di tur carni:Acaso tin algo cu ta mucho dificil pa Mi?
Rabia y odio no ta obra pa e bondad di Dios,nos tin di pone rabia y odio un banda, y bisa Senjor pordona hende, pasobra nan no sa kico nan a haci, anto na e momento ey Dios ta sali dilanti pa nos, y nos lo mira man di Dios move na nos fabor.
Den Nehemias capitulo 4, Tobias, Gesem y Shanbalat a purba tur manera pa stroba Nehemias den e obra cu Dios a mande, pero nan no a logra.
Den e sistema di mundo actual nos por compara e 3 hendenan aki como, Egoismo, Envidia, y Odio.
Pero nos sa cu eseynan ta mal influencia y mal influencia nunca por vence poder di Dios.
Pesey e palabra di Dios ta sinja nos tur den Santiago 1:5 bisando: Ma si cualkier di boso falta sabiduria,lage pidi Dios,Kende ta duna na tur hende generosamente y sin reproche lo wordo duna na dje.
Esaki ta nifica pa nos hubentud, cu no ta tempo di cana den rabia y odio contra otro, pasobra esaki a logra algo y ami no a logra.
Pasobra Dios tey pa nos tur.
Sinceramente, Pastor Marcel Balootje
