Banco Central di Aruba (BCA) a conclui e encuesta di percepcion di negoshi pa e segundo trimester di 2026. E encuesta di percepcion di negoshi ta evalua e percepcion economico di e negoshinan local.
E asina yama ‘Business Perception Index, cu ta consisti di e indicenan di condicion economico a corto plaso y condicion economico actual, a subi cu 3,2 punto di indice te na 107,5 den e segundo trimester di 2026 (mira Grafico 1).
Grafico 1: ‘Business Perception Index’.
Fuente: Banco Central di Aruba
E indice di condicion economico a corto plaso y e indice di condicion economico actual a subi cu 4,7 y 1,8 punto di indice te na 107,1 y 107,8, respectivamente (mira Grafico 2).
Grafico 2: Resultado di Condicion Economico actual y Condicion Economico a corto plaso durante e segundo trimester di 2026.
Fuente: Banco Central di Aruba
E porcentahe di negoshi encuesta cu ta anticipa un crecemento economico flat den e siguiente 12 lunanan a subi cu 13,5 punto di porcentahe te na 56,4%. Mientrastanto, e porcentahe di negoshi encuesta cu ta anticipa un crecemento economico negativo den e siguiente 12 lunanan a baha cu 14,3 punto di porcentahe te na 0%, durante e segundo trimester di 2026 (mira Grafico 3).
Grafico 3: Expectativa di crecemento economico den e siguiente 12 luna.
Fuente: Banco Central di Aruba
Durante e segundo trimester di 2026, e porcentahe di negoshi encuesta indicando “crecemento” den empleo a subi cu 2,4 punto di porcentahe te na 53,9%. E porcentahe di negoshi encuesta cu a raporta un “ganashi” a subi cu 1,2 punto di porcentahe te na 92,2% den e segundo trimester di 2026. E porcentahe di negoshi encuesta indicando “ningun cambio” den e actividadnan economico di inversion a corto plaso a crece cu 9,3 punto di porcentahe te na 48,7% den e segundo trimester di 2026. Encuanto condicion economico a largo plaso pa e siguiente 12 lunanan, 48,7% ta anticipa cu e tasa di inflacion lo ta entre 2% y 3%.
E relato completo di e encuesta di percepcion di negoshi ta disponibel ariba website di BCA www.cbaruba.org
