Pa varios siman caba, Prome Minister Mike Eman, hunto cu un grupo di boluntarionan, ta dedica nan diasabra mainta te cu merdia pa sigui cu e revitalisacion di Bernhardstraat na San Nicolas. Mientras algun ta verf y drecha casnan, otro hendenan den comunidad ta aporta na nan propio manera pa sostene e esfuerso.
Un ehempel special ta Maria Garcia Hernandez, kende cada diasabra ta lanta tempran pa cushina pa tur e boluntarionan cu ta traha na Bernhardstraat. Maria a conta cu ora el a mira con e boluntarionan ta dedica nan tempo gratuitamente pa pone e bario mas bunita, el a sinti cu tambe el kier pone man na obra. Su manera di aporta ta door di prepara cuminda y bebida pa e grupo. “No ta posibel cu mi no sali duna un tiki cuminda, un juice, algo pa motiva nan mas,” Maria a bisa.
Cada siman el ta prepara algo diferente. El a cushina entre otro sopi, aros moro y spaghetti, ademas di percura pa awa y bebida. Pa logra tin tur cos cla na tempo, Maria ta lanta seis or di mainta pa cuminsa cushina. “Mi ta lanta seis or pa cushina, prepara tur cos pa ora nan ta bini,” el a conta, destacando cu el ta haci esaki cu hopi amor.
E aporte di Maria ta mustra cu boluntarismo no ta solamente e trabou cu ta wordo haci cu verf of material. Tambe e persona cu ta cushina, trece awa, yuda cu material of brinda un man extra ta forma parti di e mesun esfuerso. Pa Maria, e importante ta cu comunidad mes participa y aprecia loke Aruba tin. El a expresa su gratitud pa e boluntarionan cu ta haci e trabou di curason y cu ta contribui pa pone Aruba mas bunita.
Asina, e revitalisacion di Bernhardstraat ta bira un esfuerso verdaderamente comunitario. Mientras e boluntarionan ta pone man na obra cas pa cas, Maria ta percura cu nan haya un plato di cuminda prepara cu amor. Su ehempel ta mustra cu cada aporte tin balor y cu ora comunidad traha hunto, cambio ta bira visibel.
