Minister Gerlien Croes a presenta e siguiente pasonan cu Gobierno di Aruba ta tuma pa modernisa y digitalisa su organisacion y servicionan.
Gobierno ta siguiendo un trayecto paso pa paso pa construi y implementa e fundeshi di un gobierno mas digital unda sistemanan por comunica cu otro, por tin un identidad digital confiabel, cybersecurity ta fuerte, reglanan y standardnan cla pa tur hende, y servicionan di ICT cu por wordo comparti entre diferente departamentonan.
Como siguiente paso, Gobierno na e momentonan aki ta prepara un proyecto piloto pa conecta varios servicio publico. E intencion ta cu informacion por wordo comparti directamente y di forma sigur entre e instancianan concerni. Esaki mester conduci na menos papel, menos retraso, menos duplicacion di trabou y informacion mas confiabel pa ciudadano y pa Gobierno mes.
Ora e proyecto piloto demostra cu e modelo ta funciona bon, Gobierno lo amplia e manera di traha aki gradualmente na mas departamento y pa mas servicio. Asina digitalisacion ta crece di forma controla y sostenibel, en bes di depende di solucionnan separa cu no ta conecta cu otro. Den e prome fase ta trahando pa interconecta departamento di DIMAS, CENSO y IMPUESTO.
Actualmente, e organisacion di ICT den Gobierno ta hopi fragmenta: diferente departamento tin nan propio sistema, contrato, licencia y proveedor. Esaki ta haci coordinacion mas dificil, aumentando dependencia y por conduci na gastonan cu por wordo evita.
Pa pone mas coherencia den e maneho y ehecucion, Gobierno ta propone dos structura cu tin funcion diferente, pero cu mester traha estrechamente hunto:
- CIO-Office: lo duna direccion strategico y establece maneho y standardnan comun pa ICT, cybersecurity, data, cloud y innovacion.
- SSO-ICT: lo concentra riba ehecucion y entrega di servicionan ICT comparti, entre otro infrastructura digital, digital workplace, contractnan, proveedornan y licencianan.
Un ‘Programma Manager’ pa guia e cambio
Pa coordina e transicion aki, Gobierno tin actualmente un destaho publico habri pa un ‘Programma Manager’ pa e structuracion di SSO-ICT y CIO-Officer. E deadline pa aplica ta 28 di augustus 2026, 23:59 AST, por aplica via e-mail na: aanbestedingen.kojis@arubagovernment.aw.
E ‘Programma Manager’ lo tin un rol central den e organisacion di e cambio y lo coordina e aspectonan organisatorio, tecnico y humano di e programa. Pesey experiencia den ICT ta importante, pero igualmente importante ta experencia cu reorganisacion, maneho y cambio organisatorio. Gobierno no ta buscando solamente experto tecnico, sino profesional cu por yuda transforma e organisacion den practica.
Digitalisacion ta trata tambe di hende
Tecnologia so no ta transforma Gobierno. E hende cu mester traha cu e sistemanan, maneha nan y sigui desaroya nan ta igualmente importante. Pesey Gobierno di Aruba ta traha hunto cu DRH pa mehora contrata personal, formacion, desaroyo y retencion di talento ICT. Door di fortalece e conocemento interno y comparti experticio entre departamentonan, Gobierno por bira menos dependiente di proveedor externo y por mantene mas conocemento esencial dentro di su propio organisacion.
Di idea pa implementacion
E direccion aki no a nace di un dia pa otro. Na januari 2026, durante un pressure cooker cu sosten di TWO Hulanda, a traha intensivamente riba e modelo y e pasonan necesario. Awor e fase di preparacion ta pasa pa accion: e proximo paso ta transforma e direccion acorda den un programa concreto, cu responsabilidadnan cla, prioridadnan defini y resultadonan cu por wordo implementa y midi.
E meta final ta cu Aruba tin un Gobierno Digital cu no ta depende di un solo proyecto, un solo sistema of un solo proveedor. Gobierno mester tin e capacidad pa mantene, proteha y sigui desaroya su servicionan digital, tambe despues cu un proyecto particular a termina.
Pesey Aruba no ta inverti solamente den tecnologia. E inversion ta igualmente den bon gobernacion, talento, siguridad, standardnan comun y capacidad interno. Esaki ta e fundeshi necesario pa un Gobierno Digital cu ta funciona awe, pero cu tambe por sigui crece y sirbi Aruba den futuro.
Un invitacion na tur interesado pa participa na e destaho publico y ta parti di e sesion informativo 19 di augustus proximo na Cas Veneranda (Oficina di DEACI) cuminsando 9:00 di mainta.
