Bo palabra ta e lampi pa mi pia y e lus pa mi caminda (Salmo 119:105).
Esaki ta nifica:
E ta mustra e caminda.
E ta kita confusion.
E ta preveni caida.
E ta expone realidad.
E ta derota scuridad.
E ta duna comprendemento.
E ta duna bida spititual.
E ta ofrece bida nobo.
E ta yena nos cu speransa.
E ta hiba nos na bida eterna.
Sin Su lus bida no por wordo sostene riba e mundu.
Hesus a bisa: Ami ta e lus di mundo,esun cu sigi Mi lo no cana den scuridad, ma tin e lus di bida.
Tambe e palabra di Dios ta sinja nos bisando den Juan 3; 19-21.
Esaki ta e condenacion,cu e lus a bin den mundo, y hende tabata stima e scuridad mas cu e lus,pasobra nan hechonan tabata malo.
Pasobra esun cu ta haci maldad ta odia lus,y no ta bin na e lus, pa su hechonan no wordo exponi.
Ma esun cu ta practica berdad ta bin na e lus, pa por wordo manifesta, cu su hechonan ta wordo haci den lus.
Hesus a lanta su disipelnan cu un disipulado fuerte, pa asina nan ta fuerte, pasobra nan tin cu guia otro nan pa nan tambe fuerte.
Den e tempo cu nos ta bibando awor aki e palabra scirbi den 2 Timoteo4:3 ta bira realidad bisando:
Pasobra tempo lo bin, cu nan lo no soporta doctrina sano mas, ma alcontrario,pa satisface nan mes deseonan, nan lo acumula pa nan mes sinjadornan pa bisa nan loke nan horea cu ta kishiki kier tende, y lo bira nan horea pa e berdad y bolbe na fabula.
Hende kier tende di prosperidad, di crecemento, hopi profecia, hopi palabra hopi estudio, pero hopi no kier tende di bandona e caminda di pica, arepenti, pone Cristo na prome lugar, pordona di curason, stima di berdad, y mas cu tur cos biba den temor di Dios.
Un hende cu no kier tende e berdad, ta manera un cas sin fundeshi.
Awendia hende no kier tende e berdad , pasobra berdad ta zona manera bo ta husga hende, pero un cos mester wordo bisa cu berdad ta lus, y esun cu sa e berdad, y no ta bisa e berdad manera e ta na su amigo, no ta amigo, e ta un compinche den maldad, cu ta hiba hende den scuridad.
Laga boso lus briya dilanti di hende, di tal manera cu nan por mira boso obranan, y glorifica boso Tata cu ta den cielo.
E lus ta nifica , cana den obedencia na Dios.
Di tur manera Dios kier trece hende su lus bisando: Si nos confesa nos pica, E ta fiel y husto di pordona y libra nos di tur inhusticia.( 1 Juan 1:9).
Esaki ta nifica cu door di confesion di pica na Dios, nos ta bini na e lus, pero tambe ta nifica cu si nos keda den scuridad, nos no por culpa ningun hende, pasobra e porta ta habri pa tur arepenti.
Por fabor no lubida esaki: Si nos bisa cu nos tin comunion cun’E,y sinembargo , nos ta cana den scuridad, nos ta ganja y no ta practica e berdad,ma si nos ta cana den e lus, mescos cu E ta den lus,nos tin comunion cu otro,y e sanger di Hesus, su Yiu ta limpia nos di tur pica.
Cana den lus ta nifica, cana leu for di redo, egoismo, jaloersheid, falta di pordon, acepta coreccion, pa asina hende por sinja,no sconde nada, pasobra dilanti di Dios, no tin bida priva, ta tur cos ta sali na cla.
Sinceramente, Pastor Marcel Balootje
