Ta algo masha bunita, si un famia completo por a dedica un dia na ayuno, oracion y alabansa na cas.
Caminda mama. Tata, y yuinan , ta paga telefon, paga radio y tv y pone e dia disponibel pa Dios.
Porta lesando e articulo aki. Bo ta mira e necesidad den bo hogar pa boso hacie,
Ban cuminsa cu 1 ora. Despues nos ta bay pa mitar dia despues un dia completo.
Den tur situacion den nos bida oracion ta importante.
Awor aki tambe nos ta tende di parti dokter cu ayuno ta bon pa henter nos curpa.
Alabansa ta fortifica nos spirito, paso e ta hiba nos den un contacto intimo cu Dios.
Hopi biaha por sosode cu durante bo ta alaba Dios . Bo ta cuminsa yora, esey no ta nada malo, esey ta Senjor kitando carga for di bo sin cu bo sa, hopi biaha durante alabansa nos ta arepenti, y nos kier yega mas serca , ta pesey nos ta yora den su presencia.
Nos tin cu acepta algo grandi y berdadero y pensa esaki pa un momento:
Hesus a haci oracion prome cu e bay na crus, y hasta ora e tabata riba crus e papia cu Tata bisando, pordona nan , pasobra nan no sa kico nan a haci.Hesus tabata haci oracion constantemente.
Rey Ezekias a haci oracion y Dios a salba su pais y su bida, mandando un Angel.( Isaias 37:14-38);
Elias a haci pa awacero cay y awacero a cay.
Pablo y Silas a haci oracion den prison y porta di prison tembla y habri.
Iglesia a haci oracion y Dios a manda un angel saca Pedro for di prison.
Daniel a haci oracion y Dios a manda un angel sera boca di leon den e cueba,
Tin diferente rey den bijbel cu a aserca Dios den ayuno y oracion y a gana bataya grandi.
Hesus a bay den ayuno den desierto y asina ricibi forsda contra e enemigo.
Hesus a sinja su disipelnan cu tin cierto demonjo cu ta sali cu ayuno y oracion.
Ayuno ta un disiplina spiritual cu ta necesario den nos bida, e ta hopi impotante pa nos crecemento,pasobra e ta hiba nos den humildad dilanti Dios.
Un ora di ayuno den tur humildad y seriedad ta move montanja den nos bida.
Pasobra Dios su nomber ta wordo honra, y nos lo wordo bendiciona.
Ora nos ta papia di alabansa nos ta papia di un sacrificio bibo di adoracion na Dios.
Nos ta adora Senjor den Spirito y berdad.
Nos ta adora Senjor cu henter nos curason, y no solamente cu nos boca.
Alabansa y adoracion ta un expresion profundo cu nos ta duna na Senjor cu confiansa, pasobra Senjor so ta digno y ta merece tur alabansa.
Durante alabansa y adoracion nos ta expresa nos curason na Dios.
Enemigo ta haci tur cos pa stroba , oracion, alabansa y ayuno, pasobra e sa cu a medio di esey nos forsa spiritual ta aumenta.
Den Alabansa y adoracion, nos ta experiencia e poder di Spirito Santo den nos bida.
Den nos oracion Dios ta papia cu nos.
Den ayuno nos busca mas intimidad cu Dios.
Pesey ora nos bida ta falta . Oracion, ayuno y alabansa, nos bida ta seco spiritualmente, y nos ta fria den nos servicio na Senjor.
Mientras cu ayuno. Oracion y alabansa ta bibo den nos bida, nos ta manera un mata planta canto di riu cu ta duna fruta na su tempo, y tur ora nos ta contento pasobra Su Palabra y Su poder ta biba den nos.
Sinceramente, Pastor Marcel Balootje
