Mi rumannan stima, awe nos por lesa den e palabra di Dios, cu e di dos mandamento ta mes importante cu esun prome, cual ta Stima Dios cu henter bo curason, alma y mente. Dus bo por imagina bo con importante e di dos mandamento ta? Bo por imagina bo con serio esaki ta? Hesus ta avisa nos y ta spierta nos cu e manera cu nos ta trata nos prohimo ta mes importante cu na e manera cu nos ta trata Dios. Nos mester trata nos prohimo na e mesun manera cu nos ta trata nos mes, cu hopi amor, hopi cariño y hopi respet. Nos mester tin un bon relacion cu nos prohimo, evita di rabia of keda rabia, no trata nos prohimo cu desprecio of cu arogancia, no descrimina, no haci redo riba dje, no ofend’e ni rebah’e, no humili’e y ni tene distancia di dje paso e ora ey nos no ta cumpli cu e di dos mandamento.
Oracion: Tata awe nos ta pidi Bo pa yuda nos pa nos por keda den Bo caminda y cu nos por cumpli cu e di dos mandamento. Siña nos cada dia di nobo pa stima nos prohimo manera nos ta stima nos mes. Danki Tata pa tur loke cu Bo ta haci pa nos, nos ta yama Bo danki den e nomber di Hesus. Amen.
