E notorio Joran van der Sloot (39) a presenta un peticion oficial pa wordo traslada di e prizon di maximo siguridad di Challapalca, ubica den e seronan friu di zuid di Peru. Segun medionan di comunicacion Peruano, Van der Sloot a declara cu e ta victima di “tortura psicologico” casi dariamente y cu e ta ricibi amenasa di morto constante cu ta afectando su salud mental y e siguridad di su famia.
E prizon di Challapalca ta conoci pa su condicionnan extremo y pa hiba e criminalnan mas peligroso di e pais. Segun Van der Sloot a afirma, e directiva di e prizon mes ya a aproba su traslado, pero e decision final ta keda den man di un hues Peruano.
Van der Sloot ta cumpliendo un sentencia di 28 aña pa e asesinato di e hoben Stephany Flores na 2010, na cual a agrega un castigo adicional di 18 aña na 2023 pa trafico di droga dentro di prizon. E mesun aña ey, el a confesa oficialmente su culpabilidad den e desaparicion y asesinato di e hoben Mericano Natalee Holloway na Aruba na 2005, como parti di un acuerdo pa reduccion di castigo na Merca. Segun e calculonan actual, e no lo drenta na consideracion pa libertad condicional te den careda di aña 2045.
E peticion di traslado aki ta bin despues cu na fin di aña pasa Van der Sloot a wordo haya severamente herida den su cel. Despues el a admiti den un entrevista na television Peruano cu e incidente ey tabata un intento pa caba cu su propio bida debi na e presion mental cu e ta sinti.
