Conservacion di nos casnan historico y nos monumentonan ta esencial pa proteha identidad di Aruba y garantisa cu e siguiente generacionnan por sigui conoce e historia di nan pais. Cu e mensahe aki, Prome Minister Mike Eman a destaca importancia di e charlanan cu Monumentenbureau Aruba ta organisando di bario pa bario pa acerca informacion tocante proteccion di monumentonan directamente na comunidad. Durante un di e charlanan mas recien na MFA Savaneta, Minister Wyatt Ras tambe tabata presente, como tambe propietario y interesadonan a bin hunto y a haya informacion tocante e proceso pa un cas of edificio haya status oficial di monumento, kico e proteccion ta implica y ki pasonan mester sigui.
Prome Minister Eman a splica cu e iniciativa tin un meta importante: acerca Monumentenbureau na comunidad y elimina diferente duda cu ainda ta existi tocante declaracion di un propiedad como monumento. Segun Prome Minister, tin mas cu 350 cas y edificio na Aruba cu ta bin na remarca pa eventualmente haya proteccion como monumento. P’esey, Gobierno kier intensifica e proceso den e lunanan venidero y acerca propietarionan directamente pa splica nan posibilidadnan.
Monumentonan ta conta ken nos ta
Pa Prome Minister Eman, e importancia di conserva patrimonio ta bay mucho mas leu cu arkitectura. Casnan tipico Arubiano ta conta con generacionnan anterior a biba y adapta na condicionnan di nos isla. E murayanan hancho, posicion di cas pa beneficia di biento y diferente forma di construccion pa mantene interior fresco ta mustra e conocemento y creatividad cu tabata existi den otro epocanan. Eman a destaca cu precisamente e elementonan aki ta forma parti di Aruba su identidad. Proteccion legal ta permiti conserva e caracter di e propiedad y procura cu e historia cu e representa no perde cu pasa di tempo. Monumentonan cu awe Aruba ta reconoce y aprecia ta resultado di e mesun tipo di esfuerso di conservacion. Prome Minister a menciona, entre otro, Willem III Toren y Fort Zoutman, mientras cu otro patrimonio importante ta pasa door di proceso di restauracion. Cada proyecto ta contribui na conserva un parti di historia cu Aruba no por reemplasa na momento cu e perde.
Aclara duda di propietarionan
Raul Gei di Monumentenbureau Aruba a splica cu durante e charlanan nan ta duna informacion amplio tocante kico ta un monumento, ki caracteristicanan ta evalua y con e proceso legal pa proteccion ta funciona.
Un parti importante di e trabou ta precisamente atende pregunta y preocupacion di propietarionan. Segun Gei, proteccion di casnan historico ta importante pa evita cu Aruba gradualmente perde elementonan cu ta forma parti di su cultura y identidad. P’esey, Monumentenbureau ta orienta propietarionan tambe riba con nan por inicia e proceso si nan propiedad tin e caracteristicanan necesario.
Bario pa bario
E intencion ta pa e charlanan continua den diferente bario, haciendo e informacion mas accesibel y dunando propietario oportunidad pa plantea nan pregunta directamente. Prome Minister Eman a elogia e trabou di Monumentenbureau y di Raul Gei pa conscientisa comunidad, pero particularmente pa brinda claridad na propietarionan cu tin inkietud tocante locual status di monumento significa pa nan propiedad. Eman a invita esnan cu tin un cas of edificio cu posiblemente tin balor monumental pa acerca Monumentenbureau y informa nan mes riba e proceso. “Ta importante pa nos conserva nos casnan y proteha nan pa futuro,” Prome Minister a enfatisa.
Pa Gobierno, cada cas tipico, edificio historico y monumento cu Aruba logra conserva ta un parti di su historia cu ta keda bibo. Proteha nan awe ta garantisa cu generacionnan di mañan ainda por mira, conoce y compronde di unda Aruba a bin.
