Un peloton militar Franses di Martinique a konkluí su entrenamento na Kòrsou e siman aki. E miltarnan Franses ta forma parti di e di 2 Kompania di e 33 Regimento di Infanteria di Marina (33 RIMA), ku sede na Fort Desaix na Martinique.
Na Kòrsou, e peloton franses a trein huntu ku e peloton di boto i personal militar di Kòrsou (CURMIL). Durante e ehersisio ku e peloton di boto, e trupanan a praktiká vários abilidat di anfibio. Nan a trein transferensia entre barkunan na diferente velosidat i a ehekutá aterisahe for di awa. E entrenamentu a konkluí ku un senario ku ta enfoká riba moveshon i retiro rápido. Adishonalmente, entrenamentu konhunto ku CURMIL a tuma lugá na e eks Hospital St. Elisabeth (SEHOS), kaminda e partisipantenan a praktiká vários abilidat táktiko dirigí riba operashonnan den ambientenan urbano.
E entrenamentu ta sirbi komo un ehèmpel bunita di e koperashon fuerte entre e dos partnernan. Dor di kolabora i interkambiá konosementu i eksperensia, e unidatnan militar ta fortalesé nan lasonan i ta engtrandesé nan posibilidatnan operashonal konhunto. E koperashon aki ta kontribuí na e relashonnan fuerte entre partnernan militar den e region. Kompartí konosementu i realisá entrenamentu konhunto ta vital pa sostené seguridat i stabilidat regional.
