Den preparacion pa e Dia Nacional pa Cuida Aruba di mañan diasabra 29 di augustus, trabounan di limpiesa ya a cuminsa den diferente parti di isla. Durante awe diamars, ploegnan di Bureau City Inspector (BCI), Departamento di Obra Publico (DOW) y Serlimar a uni forsa pa adelanta trabou den varios area y banda di camindanan principal.
E accion ta forma parti di e esfuerso nacional pa Cuida Aruba, cu ta busca no solamente atende desperdicio, sino tambe crea un movimento mas amplio di cuido y responsabilidad pa nos espacionan publico.
Durante e accion di awe, trabou a tuma luga na un total di 13 localidad: Maria Maai, Siribana, area di Super Food, Palm Beach, Rooi Prikichi, Koeriboeri, Ayo, highway di Seroe Teishi pa Drive-In, highway di Mahuma pa Seroe Teishi, San Fuego pa Jamanota, Weg Kustbatterij, Rooi Brazil Brian y Sero Biento.
Cada localidad tabata conta cu supervision di un opzichter di DOW, BCI of Serlimar, como parti di e coordinacion entre e diferente instancianan.
Na Siribana, Mirella Landscaping a forma parti di e ploeg cu a sigui cu trabounan di limpiesa den e area. Den Ayo/Santa Lucia, Ploeg Tavares tambe a pone man na obra, mientras cu otro ploegnan a sigui atende e diferente localidadnan programa.
Na Seroe Teishi tambe por a mira e trabou den accion, particularmente banda di caminda, como parti di e preparacionnan cu ta tumando luga prome cu e accion nacional.
E movemento cu ya ta visibel den diferente parti di Aruba ta ilustra e meta mas amplio di Cuida Aruba: uni capacidad y esfuerso di diferente instancia pa atende nos medio ambiente y mantene e isla limpi.
Prome Minister Mike Eman ta considera e cooperacion aki un parti importante di e cultura cu Gobierno kier sigui stimula rond di Cuida Aruba: cu cuido pa nos isla no ta limita na un solo dia, sino mester bira un responsabilidad comparti y continuo.
E trabounan di awe ta sirbi como adelanto pa e Dia Nacional pa Cuida Aruba di mañan, diasabra 29 di augustus, ora e esfuerso lo sigui na escala nacional cu diferente punto di deposito disponibel pa comunidad. Pa mas informacion di localidad nan di desperdicio, por subi riba e website: Cuidaaruba.com
Gobierno ta gradici e diferente ploegnan y instancianan cu ta poniendo man na obra y ta invita comunidad pa sigui contribui na e meta comun: un Aruba mas limpi, cuida y agradabel pa nos tur.
