Segun OM a informa diamars merdia, Stichting “Hunto Nos Por” cu ta pertence na Fraccion di POR den parlamento ta bao di investigacion di husticia. Ministerio Publico a menciona cu nan a laga pone beslag riba un suma di placa, cu ta algo irregular y te hasta a denomina e hecho aki como malversacion di fondo publico.
Ministerio Publico a bisa tambe cu tin hendenan marca como sospechoso, pero no a menciona nomber.
For di informacionnan cu SOLO DI PUEBLO a logra copila, ta mustra cu un di e sospechosonan principal ta Sr. Alan Howell, lider di Partido POR. Hunto cu Alan Howell, e tesorera di e fundacion ta Sra. Jacky van Putten. Probablemente e tambe mester duna cuenta di e movecion di placa.
Cuanto placa?
Tur porta ta hermeticamente cera, sinembargo, riba algun red di telefon ta circulando algun informacion, cu ta sona rasonabel. E mensahe ta bisa cu Fundacion di POR ta ricibi tur luna 10 mil florin, pa paga entre otro ayudante di fraccion. E placa aki lo no tabata wordo usa y na dado momento tabatin un suma di Afl. 300.000.00 florin riba e cuenta aki. E suma aki a wordo transferi riba cuenta bancario di Sr. Howell. Aki ta unda e alarma a cuminza grita den MOT y a informa Ministerio Publico.
E beslag cu a wordo poni, aparentemente ta riba cuenta di Sr. Alan Howell.
