Red Arubiano di Prensa Profesional (RAPP) a pidi Minister President Mike Eman por escrito, na ocasion di Dia di Prensa, pa institui un ora di pregunta structural y periodico cu Gobierno di Aruba.
RAPP ta constata cu, desde cu gabinete AVP-Futuro a bin den gobernacion, relativamente poco conferencia di prensa completo a wordo organisa unda periodista ta haya suficiente oportunidad pa haci pregunta. Mas frecuentemente, periodista ta wordo invita pa momentonan di prensa of di potret rond di un topico specifico, unda no semper tin espacio pa haci pregunta adicional of pregunta tocante otro asunto actual.
“Periodistanan mester por haci pregunta na nomber di comunidad, verifica e contestanan y sigui puntra unda ta necesario. Pa esey tin mester di momentonan unda no solamente e mensahe di Gobierno, sino tambe e preguntanan independiente di periodista ta central,” segun RAPP.
Pesey, e asociacion ta propone pa organisa un ora di pregunta riba momentonan fiho cu ta wordo anuncia di antemano. Esaki mester contribui na mihor acceso na informacion di Gobierno, mas transparencia y mihor rindimento di cuenta na pueblo.
Un copia di e carta a wordo manda na minister di Telecomunicacion René Herde, director di Gabinete di Gobernador di Aruba, Vertegenwoordiging van Nederland in Oranjestad (VNO) y Free Press Unlimited.
E carta completo ta inclui como anexo di e comunicado di prensa aki.
Nota pa redaccion:
Pa mas informacion por tuma contacto cu Red Arubiano di Prensa Profesional (RAPP) via rapp.aruba@gmail.com.
