Fraccion di MEP a dirigi un serie di pregunta parlamentario por escrito na Gobierno tocante e decision pa prolonga e validez di e Ruimtelijke Ontwikkelingsplan met Voorschriften (ROPV) te cu 17 di juli 2029. Fraccion di MEP ta sumamente preocupa, tanto cu e contenido di e decision aki como cu e manera cu Gobierno a yega na dje. Un decision di e magnitud aki, cu ta afecta directamente e desaroyo di Aruba durante e proximo tres añanan, no por wordo tuma sin informa Parlamento di antemano y sin duna pueblo di Aruba un splicacion cla.
Falta di transparencia y consulta
Fraccion di MEP ta considera totalmente inaceptabel cu Parlamento, como representante di pueblo, mester haya sa via prensa cu Gobierno a tuma un decision di e trascendencia aki pa futuro di nos pais. E fraccion ta cuestiona seriamente con por ta posibel cu un minister ta prolonga e ROPV sin haci e debida consultanan cu e instancianan relevante.
E decision aki ta lanta ainda mas pregunta considerando cu diferente minister di e gabinete actual a expresa anteriormente den Parlamento cu ta urgente pa adapta e ROPV. Gobierno mes a reconoce cu e cambionan aki ta necesario pa crea espacio pa construccion di cas, diversificacion economico y proyectonan di energia sostenibel (manera un parke nobo di molina di biento). Si Gobierno mes ta consciente cu e ROPV actual ta frena e desaroyonan aki, Fraccion di MEP kier sa pakico a opta pa prolonga e mesun restriccionnan aki te cu 2029.
Impacto riba vivienda y escasez di terreno
Un di e retonan mas grandi cu Aruba ta enfrentando actualmente ta e escasez agudo di vivienda y tereno. Pa Fraccion di MEP, e situacion aki ta sumamente preocupante, mirando cu hopi famia y hoben Arubiano ta den buskeda di un cas pagabel, mientras otronan tin añanan ta warda riba un contesta pa nan peticion di tereno di erfpacht.
“Gobierno no por, na un banda, reconoce cu Aruba tin un problema serio di vivienda y, na otro banda, prolonga e reglanan existente sin splica con esaki lo yuda soluciona e crisis aki, crea mas cas y pone mas tereno disponibel pa nos pueblo,” Parlamentario Dangui Oduber a expresa
Pa e motibo aki, MEP ta exigi pa Gobierno presenta cifra y datanan concreto tocante:
- Cuanto peticion pa tereno pa vivienda ta pendiente actualmente.
- Cuanto peticion a drenta den 2025 y cuanto di nan a wordo procesa.
- Cuanto tereno Gobierno realmente tin disponibel y cuanto ta planea pa pone disponibel den 2026, 2027 y 2028.
- Y cua ta e criterionan cu Gobierno ta uza pa determina prioridad den e dunamento di tereno.
Ademas, Fraccion di MEP ta boga pa un sistema transparente caminda cada ciudadano por sigui status di su peticion di cerca, enfatisando cu tereno di Gobierno ta pertenece na pueblo y mester wordo parti di forma husto, transparente y sin privilegio.
MEP ta exigi transparencia completo
Por ultimo, e fraccion a solicita pa Gobierno entrega copia di tur conseho por escrito, nota oficial, memo, analisis y un relato cronologico completo di e proceso cu a forma e base pa e decision di prolonga e ROPV te 2029. MEP ta reitera cu pueblo di Aruba tin derecho di sa kico a motiva e decision aki y ta exigi transparencia completo, contestanan concreto y un vision cla pa e futuro di nos pais.
Pa MEP, e pregunta central ta keda: Con Gobierno kier soluciona e crisis di cas, crea oportunidad pa diversificacion economico y haci espacio pa energia sostenibel, si na mesun momento Gobierno mes ta extende e reglanan cu ta frena esaki te 2029?
