E vision di Prome Minister Mike Eman pa embeyese Bernhardstraat a cuminsa crea algo cu ta bay mas leu cu solamente verfmento di casnan: un movemento di tarea boluntario cu ta sigui crece.
Cada siman, mas hende ta mira loke ta pasando den e bario y ta sinti nan mes motiva pa aporta nan tempo, energia y talento. Loke a cuminsa como un iniciativa pa embeyese casnan ta creciendo y ta logra atrae tanto boluntarionan local como personanan cu ta bishita Aruba.
Durante Art Week Aruba, varios participante cu a bin for di Europa a scoge pa dedica parti di nan tempo na e proyecto.
Angie Ceretti, Bruno Araújo y Sebastian Bufulette ta un ehempel di esaki. Nan a bin Aruba pa Art Week, pero a tuma tempo pa yuda verf casnan, conecta cu habitantenan y contribui na embeyesemento di Bernhardstraat.
Nan a comparti con nan ta disfrutando di e experiencia y con e casnan, despues di haya un capa nobo di verf, ta haya un aspecto completamente diferente: mas fresco, cu colornan mas briyante y un ambiente cu ta transmiti alegria. Nan ta kere tambe cu un Bernhardstraat mas bunita por contribui na atrae mas bishitante pa San Nicolas.
Esaki ta un ehempel bunita di con e proyecto ta logra conecta arte, trabou boluntario y comunidad, y con personanan cu a bin Aruba pa un evento cultural ta sinti nan mes motiva pa tambe laga un aporte positivo atras.
Tito Bolivar, director artistico y organisador di Art Week Aruba, a conta cu boluntarionan di European Solidarity Corps tambe a participa den e iniciativa. Como parti di un actividad di team building, nan a bin Bernhardstraat pa pone man na obra y yuda cu verfmento di casnan, den preparacion pa Art Week Aruba y e muralnan local y internacional cu lo cuminsa dia 3 di september.
Barbara y Silvia, tambe boluntarionan di Art Week, a comparti nan experiencia. Apesar cu calor y cansancio despues di nan biahe a representa un reto, nan ta disfrutando di e trabou y ta contento di por aporta na comunidad.
E fenomeno aki ta bira cada siman mas visibel: mas hende kier bira parti di e proyecto.
E casnan renoba ta hala atencion. E atencion ta crea interes. Y e interes ta transforma den accion. Mas boluntario local ta acerca pa yuda, mientras cu awor tambe bishitantenan for di otro pais ta mira loke ta pasando y ta dicidi di dedica parti di nan tempo na e iniciativa.
Esaki ta precisamente e tipo di trabou boluntario cu e vision ta busca stimula: un movemento caminda hende no ta warda riba otro pa haci e cambio, sino ta dicidi di pone nan mes man na obra.
Pa e boluntarionan cu ta bin di afo, tin un otro aspecto cu a yama nan atencion: mira Prome Minister Mike Eman personalmente den e bario, poniendo man na obra hunto cu habitantenan y otro participantenan.
Nan a expresa cu ta algo special pa mira un lider den contacto directo cu comunidad y participando personalmente den un iniciativa cu ta beneficia e bario. Pa varios di nan, esaki no ta algo cu nan ta mira comunmente den otro pais.
Esey ta un mensahe fuerte: liderato tambe ta duna ehempel.
Ora un Prome Minister ta dispuesto pa dedica su tempo y energia na un proyecto comunitario, e ta mustra cu trabou boluntario no ta solamente algo cu nos ta pidi di otro. Cada un di nos por aporta un parti di nos tempo pa haci diferencia.
Un persona ta cuminsa. Otro ta mira. Otro ta dicidi di yuda. Y asina, poco poco, un movemento ta crece.
E proyecto ta local, pero su spirito no tin frontera. Un persona ta bin di Aruba, otro di Europa. Un ta residente, otro ta bishitante. Pero ora nan pone man na obra hunto pa un mesun meta, nacionalidad y distancia ta pasa pa segundo plano. Loke ta keda ta union y un deseo comparti pa aporta.
Local y internacional, hunto pa un meta: embeyese Bernhardstraat y construi un comunidad caminda cada persona por sinti cu e ta forma parti di dje.
E verf ta embeyese e casnan.
E trabou boluntario ta uni hende.
Y e union ta haci diferencia.
