E problema di camindanan den mal estado na Aruba, no ta un problema nobo. Pa enfrenta esaki di manera structural, gobierno di MEP a introduci IRIS-GO na november 2024: un sistema moderno pa inventarisa, evalua y monitorea e estado di nos red di camindanan, pa asina gobierno por actua mas liher y efectivamente den drechamento di nos camindanan.
E enfasis tabata pa no traha mas solamente despues cu un caminda a bira un problema, pero traha cu dato, planificacion y prioridad.
Pa duna contenido concreto na e vision aki, den e Najaarsnota 2024 Gabinete Wever-Croes a reserva Afl. 18 miyon pa reparacion y mehoracion di e camindanan. Esey tabata un inversion importante den siguridad, mobilidad y calidad di bida di nos pueblo. Lamentablemente e gobierno nobo no a haci uso di e Afl. 18 miyon, y a laga e placa bai pa paga debe, sin drecha ni un caminda te dia di awe.
“Mi ta contento si pa mira cu e gobierno nobo por lo menos a continua cu nos vision, den e proyecto di IRIS-GO. Esaki ta bon noticia, pasobra un sistema di e importancia aki mester surpasa gobierno y partido politico. Nos camindanan ta di nos tur” segun lider di fraccion di MEP Evelyn Wever-Croes.
Segun informacion cu e fraccion a haya, e inventarisacion di IRIS-GO awor ta completando. Y precisamente p’esey, ta tempo pa e resultado sali na cla.
“Nos a pidi gobierno e resultado integral di e inventarisacion di Iris GO: cual ta e estado di cada caminda, cual camindanan ta den e peor condicion, cual ta e criterio pa determina prioridad y cual ta e planificacion pa drecha y asfalta e camindanan. Nos pueblo tin derecho di sa cual camindanan ta riba e lista, pakico nan ta riba e lista y ki tempo nan lo wordo atende” Wever-Croes a duna di conoce.
IRIS-GO por duna nos algo cu nos a falta durante hopi tempo: un base obhetivo pa determina unda e necesidad ta mas grandi y unda e recurso publico mester wordo inverti prome.
“Ora nos a aproba e proyecto IRIS-GO, nos no tabata buscando solamente mas asfalt, nos tabata buscando un sistema di mantenimento cu ta preventivo, profesional, transparente y sostenibel. Nos a haci un yamada na gobierno pa publica e resultado integral di IRIS-GO y presenta un plan di accion concreto, cu prioridadnan cla, presupuesto y fecha pa ehecucion.
Pueblo di Aruba a warda suficiente caba. Awor nos tin dato, nos tin un instrumento y tin recurso. Laga nos usa nan pa entrega camindanan mas sigur, mas mihor y mas duradero.
IRIS-GO a duna nos e mapa. Awor ta tempo pa sigui e ruta y cumpli cu accion.
Un caminda bon manteni ta mas cu asfalt: ta siguridad, ta calidad di bida, ta progreso, y ta respeta e inversion di pueblo”, segun Evelyn Wever-Croes.
