Tempo ta cambia, hende ta cambia, pero palabra di Dios no ta cambia.
Dios a establece for di principio e matrimonio entre homber y muher, bisando den Genesis 2:24 kico lo pasa, y den Mateo 19:5 E ta bolbe confirma esey.
Ora dos persona ta drumi cu otro of mihor bisa nan tin relacion sexual cu otro y nan no ta casa, nan ta den fornicacion cual ta pica.
Ora un homber of muher casa ta tene relacion cu un otro persona cu no ta su esposo of esposa, e ta comete adulterio y esey ta pica.
Maske cu ley cambia of cos wordo tolera aki riba tera , tur hende mester corda kico ta sosode na cielo.
No ta importa ken nos ta, ni tampoco cuanto placa nos tin, ni tampoco religion, si Dios su palabra ta bisa cu locual nos ta haciendo ta pica, ta pica e ta keda.
Awendia tin hopi sorto di matrimonio cu hende a forma aki na tera, pero un pregunta ta bini, e locual hende a forma con Dios ta mire den cielo, e ta aproba of e no ta aproba?
E sistema di mundo a yega asina lew cu nos tin matrimonio entre homber cu homber, muher cu muher, hende cu bestia, y ya nos ta den e proceso di matrimonio entre hende cu robot.
Pero nada di e cosnan aki no por pasa riba locual Dios a establece, pasobra e ultimo palabra den bida di cada ken ta Dios tine, y tur hende mester duna cuenta na Dios na final.
Pero e berdad mester wordo predica, sinja, scirbi, bon presenta di tur manera pa evita cu hende lo cay den decepcion.
Awendia hopi hende jong ta cuminsa frei of namora y di eynan den un tempo record nan a cuminsa biba cu otro, pasobra asina relacion sexual drenta den e asunto ta bibamento tin, tin hopi tipo di show mara na e cos moderno aki, nos ta bay shop hunto, nos ta bay supermercado hunto, e ta bin keda na mi cas, ami ta bay keda na su cas, tur esey ta nifica cu nos ta bezig cu fornicacion.
Y nos a yega den un tempo cu hopi hende ta manera nan tin miedo di papia, pa otro no rabia.
Cristo Hesus a bisa den Mateo 11:28 : Bin serca Mi tur cu ta cansa y carga, y lo Mi duna boso sosiego.
Hende a agrega un slogan tremendo banda di dje bisando “Bini manera bo ta”
Tene cuenta e cu e slogan no ta para scirbi den Bijbel, pasobra hopi hende ta bini serca, nan kier Salbacion, nan kier bida eterna, pero nan no ta desea transformacion, pasobra transformacion ta nifica, renoba bo mente manera ta para scirbi den Romanonan 12:2 pa bo sa kico ta e boluntad perfecto di Dios pa bo bida.
Efesionan 5:1-7 ta duna un gran splicacion di locual ta inmoral y cu inmoralidad no tin entrada den cielo.
Si bo ta respeta y balora e persona cu bo conoce y bo kier pa e ta hunto cu bo, casa cune completo no solamente na gobierno pero laga pastor bendiciona boso matrimonio, pa asina Dios tuma control y fortifica boso bida matrimonial.
E wega di biba hunto, ta duna diabel e oportunidad pa manipulacion sexual,manipulacion financiero,falta di respet, y hasta violencia, jaloersheid pasobra e desconfiansa tambe tey.
Matrimonio mester wordo respeta , e cama matrimonial mester wordo respeta ( Hebreonan 13:4) y no lubida riba Juan 4; 16-18.
Tene cuenta cu aunke mundo por cambia,Dios no ta cambia.
Sinceramente, Pastor Marcel Balootje
