Evelyn Wever-Croes a haci preguntanan na e Gobierno tocante e falta di accion pa revitalisa e centro di Oranjestad y, en particular, Caya Betico Croes.
“Nos kier un Caya Betico Croes yen di bida, movimiento y energia, un luga kaminda hende ta gusta cana, cumpra, come, disfruta y pasa tempo hunto. Un centro di ciudad cu ta atrae bishitante, ta duna espacio na nos comerciante y ta habri oportunidadnan nobo pa inversion y empleo.
Gobierno a priminti pa bolbe duna bida na nos centro di ciudad, pero te awe e promesanan no a bira realidad. Mientras tanto, inversionistanan ta spera pa claridad y accion, y tin riesgo cu capital cu ya ta disponibel pa Aruba, ta bay otro destino.
Nos no por permiti esaki.
Oranjestad merece un centro di ciudad dinamico, moderno y atractivo. Caya Betico Croes mester bolbe bira e curason di Oranjestad, un luga yen di bida y oportunidad ta crece.
Ta ora pa pasa di promesa pa accion. Ta ora pa duna Oranjestad su bida bek!
