Aruba Fair Trade Authority (AFTA) lo cuminsa otro siman cu un serie di sesionnan di informacion pa sector empresarial Arubano tocante legislacion di proteccion di consumidor. Cu e sesionnan aki, AFTA ke duna apoyo na empresanan pa logra un mihor comprension di nan obligacionnan bou di e legislacion aki. P’esey, AFTA ta hasi un yamada na empresanan cu ta ofrece producto of servicio na consumidor pa controla nan operacion empresarial y verifica si nan ta cumpli cu e reglanan vigente. Bon cumplimiento ta proteha consumidornan y ta contribui na un terreno igual pa empresanan na Aruba. AFTA lo aborda empresanan pa participacion na e sesionnan.
Desde 15 di maart 2026, AFTA ta supervisa e cumplimiento di diferente reglanan pa proteccion di consumidornan. E supervision di AFTA ta enfoca riba seis asunto: publicidad enganyoso, comunicacion comercial (digital), condicionnan general, garantia, convenio na distancia y viahenan den pakete. Durante e sesionnan lo discuti e aspectonan principal di e temanan aki y lo splica loke e reglanan ta nifica pa empresanan. Tambe lo dedica atencion na e podernan di supervision di AFTA y na e posible medidanan di cumplimiento na caso di no-cumplimiento. Empresanan lo haña oportunidad pa hasi pregunta.
Ademas, representantenan di DEACI y SEDECO lo splica con ta trata kehonan individual di consumidor, ki proceso ta sigui den esaki y ki rolnan organizacionnan ta hunga den apoyo y guia di consumidornan. Di e manera aki, participantenan lo haña comprension tanto di e supervision di AFTA riba interesnan colectivo di consumidor, como di e tratamento di asuntonan individual di consumidor pa e instantianan cu ta encarga cu esaki.
AFTA ta e autoridad independiente y imparcial di Aruba cu ta supervisa e bon funcionamento di mercadonan pa beneficio di empresanan y consumidornan. AFTA ta investiga e mercadonan na Aruba y ta actua ora tin un violacion di e reglanan. AFTA tin podernan pa preveni mala conducta di empresanan y, unda ta necesario, aplica sancion. Mas informacion tocante AFTA, incluyendo e reportahe di 6 luna cu informacion tocante investigacionnan na curso, por wordo haya riba e website www.afta.aw.
