Hopi biaha ora un divorcio cay, bo ta tende cu porfin e muher a libra di e homber narcista ey of porfin e homber a libra di e muher, Jezabel, problematico, sin respet ey.
Hopi comentario, pero locual hende no ta ripara cu cada divorcio, of cada separacion di mayor ta un golpi pa e yuinan, y un sla pa nos sociedad, pasobra mas mucha ta bay lanta sin guia di nan tata cu nan mama original.
Aunke awendia tin tur tipo di vangnet, locual ta original ta keda original, pasobra bo por duna un lamchi lechi na tetero bebe pa falta di su mama, pero e no ta mescos cu ora e lamchi bebe directamente for di su mama.
Proverbionan 18:21 ta bisa: Morto y bida ta den poder di lenga y esnan cu stima esaki , lo come su fruta.
Hopi hende ta usa e frase aki pero no ta tur ta compronde.
No pensa. ni papia,ni desea divorcio,pasobra locual bo ta ripiti, ta bira custumber y e ta alcansa bo bida.
Pasobra bo no por papia contra di bo mes bienestar, bo no por planta un mata y despues cu bo mes boca, bo kier stanca su crecemento.
Rabia y discucion abusivo, provocacion, tiramento di cos na cara di otro, maltrato verbal constant ta aumenta duele y ta produci distancia entre hende.
Pero e otro banda mester tin un comunicacion cla tur momento den un matrimonio, no bini cu cosnan riba man y kere cu tur ora nan mester wordo haci.
Famia ta cumimsa na tur locual bo tin den cas hunto cu bo, pasobra nan ta esnan cu ta biba hunto cu bo , bo atencion mester ta dedica, pa nan ta safe.
Despues bo tin cu programma con bo ta yuda otro tur hende, pasobra e Palabra di Dios ta bisa stima bo prohimo mescos cu bo mes.
Tin cosnan cu nos no por laga cria rais den nos bida matrimonial por ehempel:
Amargura y falta di pordon.
Competencia entre pareha,cada rato mester cumpra cos djis pasobra tur dos ta traha, enbes di pone cabes hunto pa un meta.
Priminiti un yiu algo y bise si bo tata no por cumpra e cos ey pa bo , mi mes ta cumpre, enbes di educa e yiu pa e warda, y hiba un bida disiplina.
Wak bon pa e trabao cu bo ta traha, no ta kita bo tempo pa sirbi Dios, y asina tambe kita bo tempo pa bo famia.
Bo por tin un salario grandi , mediano, of chikito, pero e maneho financiero ta hopi importante, bo no por cumpra cosnan material awe y mayan bo no tin pan den cas, of bo ta cana bon bisti, pero morto di hamber.
Haci lo maximo pa evita uso di droga y alcohol.
Corda cu for di ora un hende tin un pensamento adultero for di e momento ey e ta den pica.
No laga ningun hende ni ningun circumstancia aleha bo for di cas di Dios, pasobra matrimonio ta entre homber y muher y Dios.
Bo kier tin pas y trankilidad den bo hogar, bo kier bo yiunan ta contento, bo kier aumenta e amor entre abo y bo esposa, awel aplica Filipensenan 4:8-9 den bo hogar, y wak e cambio cu ta bini diripiente.
Esun cu warda su boca ta preserva su bida , ma esun cu habri su boca hancho ta caba na ruina. ( Proverbionan 13:3).
Stima bo matrimonio y stima bo famia, balora locual Dios a duna bo, keda fiel na Dios y keda fiel tur momento na bo cas y na bo famia.
Sinceramente, Pastor Marcel Balootje
