Vivienda pagabel, mehoracion di bario y inversion den infrastructura ta entre e prioridadnan cu lo marca e trabou di Minister di Vivienda, Infrastructura, Servicio Interno y Telecomunicacion Rene Herdé den Aña Parlamentario 2026–2027.
Durante apertura di e aña parlamentario nobo, Gobierno a pone enfasis riba necesidad di traduci planificacion den inversionnan concreto cu ciudadano por mira y sinti den su bida diario. Pa Minister Herdé, esaki ta conecta directamente cu e reto di crea mas oportunidad pa vivienda, mehora nos barionan y sigui modernisa e infrastructura di Aruba.
Un di e prioridadnan ta vivienda pagabel. Cu e presion creciente riba mercado di vivienda, Gobierno a desaroya un maneho nobo pa stimula construccion di mas cas pagabel, incluyendo cooperacion cu sector priva.
Segun Minister Herdé, e tema di vivienda mester mira den un contexto mas amplio. No ta trata solamente di construccion di cas, sino tambe di crea un ambiente adecuado pa famianan biba. P’esey inversion den espacio publico, facilidadnan comunitario, infrastructura y mehoracion di bario ta forma parti di e mesun vision. Revitalisacion di Oranjestad y San Nicolas tambe lo sigui haya atencion.
Fondo di Inversion ta crea espacio pa ehecucion
Aprobacion di e ley pa crea Fondo di Inversion ta representa un paso importante den e direccion aki. Cu e base legal awo estableci, den e aña parlamentario nobo Parlamento lo trata e prome presupuesto di e Fondo.
Gobierno tin intencion di presenta inversionnan cu ta inclui, entre otro, MFA na San Nicolas, mehoracion di bario, renobacion di scol y monumento, reforestacion y embeyecimento di nos centronan di ciudad.
Pa Minister Herdé, e Fondo ta brinda un instrumento importante pa pasa di planificacion pa ehecucion y atende necesidadnan cu comunidad por experimenta directamente.
Banda di inversion fisico, e aña parlamentario nobo ta pone atencion tambe na modernisacion di infrastructura digital y telecomunicacion, cu mester contribui na miho conectividad, innovacion y actividad economico.
Modernisacion di aparato publico ta otro parti di e tarea. E meta ta pa simplifica proceduranan, mehora coordinacion y procura cu ciudadano y sector priva por haya servicio dentro di un tempo rasonabel.
Minister Herdé ta mira e diferente prioridadnan como parti di un mesun direccion: crea mas oportunidad pa vivienda, inverti den comunidad y infrastructura, y modernisa e servicionan cu ciudadano ta depende riba dje.
“E meta ta pa progreso no keda solamente den planificacion. E mester traduci den resultado concreto den nos barionan y den calidad di bida di nos hendenan,” Minister Rene Herdé a indica.
