Minister di Finansa, Asuntonan Economico y Sector Primario, Geoffrey Wever, a sali pa Santo Domingo, Republica Dominicana, pa participa na HUB Cámara Santo Domingo 2026, cu lo tuma luga dia 9 y 10 di september. E bishita tin un enfoke economico concreto pa busca acuerdo y establece e conexionnan necesario cu companianan exportador di carni pa crea e posibilidad pa Aruba cuminsa importa carni directamente for di Republica Dominicana.
E paso aki ta forma parti di e maneho di Minister Wever pa amplia conexionnan comercial di Aruba den region, diversifica nos fuentenan di abastecemento y crea mas alternativa pa importadornan y sector comercial local. Como un economia chikito y habri, Aruba ta depende grandemente riba importacion. Pa e motibo ey, ta importante pa Gobierno activamente identifica mercadonan nobo y crea e condicionnan pa sector priva por amplia su opcionnan di compra.
Republica Dominicana ta representa un mercado regional importante cu tin capacidad den produccion y exportacion di diferente producto alimenticio. Durante HUB Cámara Santo Domingo, Minister Wever lo concentra especificamente riba contacto cu companianan cu ta activo den produccion y exportacion di carni, cu e meta di explora con Aruba por agrega Republica Dominicana como un fuente adicional di importacion.
E iniciativa aki ta di acuerdo cu Programa di Gobernacion AVP-FUTURO 2025-2028, unda cu riba pagina 37 a keda acorda cu lo enfoca riba cooperacion economico y mehora comercio cu paisnan den region.
“Nos no por limita Aruba na e mesun mercado y e mesun proveedor semper. Un economia resiliente ta un economia cu tin opcion. Nos ta bay Santo Domingo cu un meta concreto cual ta pa habri e caminda pa companianan Arubano por cumpra carni for di Republica Dominicana y asina amplia nos cadena di abastecemento,” Minister Wever a indica.
E proceso ta rekeri no solamente contacto comercial, pero tambe coordinacion entre empresanan, autoridadnan competente y e diferente condicionnan cu mester cumpli cu nan pa importacion por tuma luga. Participacion na HUB Cámara Santo Domingo ta ofrece un oportunidad pa inicia y acelera e conexionnan necesario, reuni directamente cu productor y exportador y identifica companianan cu tin interes y capacidad pa atende mercado Arubano.
Pa Minister Wever, e iniciativa ta ilustra e rol cu Gobierno mester hunga den un economia moderno cu ta, no reemplasa sector priva, pero crea acceso, elimina distancia entre mercado y empresario y facilita e relacionnan cu por traduci den actividad economico.
“Gobierno su responsabilidad ta crea e condicionnan pa sector priva por move. Si nos por habri un mercado nobo, conecta importadornan Arubano cu proveedor nobo y crea mas competencia den nos cadena di suministro, nos ta fortalece e posicion di nos economia. Nos kier crea mas opcion pa empresario y, finalmente, mas opcion pa Aruba,” Minister Wever a enfatisa.
HUB Cámara Santo Domingo, conoci como “The Business Hub of the Region”, ta reuni compradonan internacional, productor, exportador, distribuidor y representante comercial den un ambiente structura pa reunionnan B2B, intercambio comercial, exhibicion y networking. E evento ta wordo organisa pa Cámara de Comercio y Producción de Santo Domingo y ProDominicana.
Ademas di e enfoke specifico riba importacion di carni, participacion di Aruba na HUB ta crea oportunidad pa sigui fortalece relacionnan comercial den sectornan manera agro, agro-industria, industria, construccion, tecnologia y energia. E vision ta pa Aruba usa su posicion geografico den Caribe pa conecta mas activamente cu economianan regional y reduci dependencia riba un cantidad limita di mercado.
Durante e dos dianan di HUB Cámara Santo Domingo 2026, Minister Wever lo sostene reunionnan y contacto cu empresanan y institucionnan relevante, cu atencion particular pa companianan exportador di carni y oportunidadnan concreto pa establece un relacion comercial cu Aruba.
“Nos ta bay cu un meta claro. No simplemente pa participa na un evento, pero pa busca resultado. Cada mercado nobo cu nos logra habri ta fortalece nos capacidad pa reacciona, crea competencia y duna sector priva mas espacio pa haci negoshi. Esaki ta e tipo di conexion regional cu nos kier sigui construi pa un economia Arubano mas fuerte y mas resiliente,” Minister Wever a conclui.
Ministerio di Finansa, Asuntonan Economico y Sector Primario lo sigui informa comunidad tocante e resultado di e reunionnan y e siguiente pasonan relaciona cu e posibilidad di importacion di carni for di Republica Dominicana.
