Awe nos por lesa atrobe di e receptividad ( aceptacion ) di Maria pa cu e accion divino di Dios, pasobra Maria ta e unico cu ta medita y reflexiona den e profundidad di su curason over di loke e angel a bisa e wardadonan. Tradicion ta siña nos cu Maria a traspasa na e apostelnan su vivencia, su experiencia profundo di e evento historico aki cu e tawata parti di dje for di e prome instancia. Maria a duna su ’Si’ na Señor y cu esaki el a pone su mes na sirbishi di e proyecto di Dios aceptando tur e consecuencianan: di un banda e vivencia di e goso di mas profundo ora el a wanta Hesus recien naci den su brasa y di e otro banda e dolor di mas profundo ora nan a pone e curpa sin bida di Hesus den su brasa. Maria ta e modelo perfecto di e prome cristian y cu su bida e ta inspira nos pa cana den su pasonan di obediencia, meditacion y discernimento pa cu e plan di salbacion di Dios den nos bida. Nos tambe por tin un experiencia divino personal y profundo si nos habri nos mes pa Hesus.
Oracion: Dios Santo, duna nos humildad y sabiduria pa asina nos por discerni y acepta Bo boluntad pa nos bida. Mama Maria, pidi pa nos. Amen.
